«Ավելի վտանգավոր, քան միջուկային զենքը». Իլոն Մասկը կրկին հիշեցրել է ԱԲ-ի սպառնալիքների մասին

ԵՐԵՎԱՆ, 14 սեպտեմբերի․/Նովոստի–Արմենիա/․ Tesla-ի և SpaceX-ի գլխավոր տնօրեն Իլոն Մասկը հիշեցրել է արհեստական ​​բանականության (ԱԲ) վտանգների մասին իր նախազգուշացումը, որը նա արել էր 12 տարի առաջ, փոխանցում է РБК-ն։

«12 տարի առաջ», - գրել է նա X-ում՝ վերահրապարակելով 2014 թվականի օգոստոսի 2-ի իր գրառումը։ Անցյալի գրառման մեջ նա նշել էր, որ «անհրաժեշտ է չափազանց զգույշ լինել ԱԲ-ի հարցում», որը «պոտենցիալ ավելի վտանգավոր է, քան միջուկային զենքը»։ Հին հրապարակման մեջ նա նաև հիշատակել էր փիլիսոփա Նիկ Բոստրոմի «Գերբանականություն. ուղիներ, վտանգներ, ռազմավարություններ» գիրքը։

Ավելի վաղ Anthropic ընկերության տնօրեն Դարիո Ամոդեին պահանջել էր դանդաղեցնել առաջատար ԱԲ-մոդելների զարգացման տեմպերը և առաջարկել էր նեյրոցանցերի ստեղծման եռափուլ ռազմավարություն՝ հավասարակշռված արագությամբ։ Նա նշել էր, որ առաջիկա 6–12 ամիսների ընթացքում արհեստական բանականության զարգացումը կարող է հանգեցնել նրան, որ ԱԲ-գործակալների շարքը «զավթի ամբողջ համացանցը»։

Մասկը պաշտպանել է Ամոդեիի դիրքորոշումը նեյրոցանցերի նկատմամբ։ Նախաձեռնությանը միացել է նաև OpenAI-ի ղեկավար Սեմ Ալտմանը։ Նա նշել է, որ ԱԲ-ի զարգացման նկատմամբ վերահսկողության քննարկումը վերջին շաբաթներին դարձել է ընկերության առանցքային թեման։