«Ուժեղ Հայաստանը» որոշել է վերցնել խորհրդարանական մանդատները և պատրաստվում է պայքարի
ԵՐԵՎԱՆ, 6 հուլիսի․/Նովոստի-Արմենիա/. «Ուժեղ Հայաստան» ընդդիմադիր դաշինքը որոշում է կայացրել վերցնել պատգամավորական մանդատները և աշխատել խորհրդարանում՝ միաժամանակ պահպանելով փողոցային քաղաքական պայքարի կուրսը։ Այս մասին հայտարարել է դաշինքի խորհրդի անդամ Նարեկ Կարապետյանը։
Նրա խոսքով՝ խորհրդարանական ընտրությունների արդյունքները վկայում են այն մասին, որ վարչապետ Նիկոլ Փաշինյանը չի վայելում ժողովրդի մեծամասնության աջակցությունը և երկրի հետագա կառավարման համար «վստահության մանդատ» չի ստացել։
«Փաշինյանն օգտագործել է գրեթե ողջ վարչական ռեսուրսը, ինչը բնորոշ է ոչ ժողովրդավարական վարչակարգերին։ Հայաստանի ժողովուրդն այս ընտրություններում քվեարկել է Փաշինյանի իշխանության դեմ, մերժել է եկեղեցու դեմ պայքարը, ազգային ինքնության թուլացմանն ուղղված քաղաքականությունը, Սահմանադրության փոփոխությունն ու զիջումները՝ ի հաշիվ ազգային շահերի»,- հայտարարել է Կարապետյանը։
Նա նշել է, որ իշխող կուսակցությանը չի հաջողվել խորհրդարանում սահմանադրական մեծամասնություն ստանալ՝ ընդգծելով, որ ընդդիմությունն այս հանգամանքը դիտարկում է որպես կարևոր քաղաքական արդյունք։
Կարապետյանի խոսքով՝ դաշինքը վերլուծել է հետագա գործողությունների տարբեր սցենարներ և հանգել այն եզրակացության, որ իշխանափոխության հասնելու համար անհրաժեշտ են ինչպես խորհրդարանական աշխատանքը, այնպես էլ զանգվածային հանրային մոբիլիզացիան։
«Որպեսզի Հայաստանում կարևոր փոփոխություններ տեղի ունենան, երկու բան է անհրաժեշտ՝ փողոցային պայքար և ընդդիմության լայն ներկայացվածություն խորհրդարանում։ Դա պետք է արվի միաժամանակ»,- ասել է նա։
Կարապետյանը հայտարարել է, որ դաշինքը մտադիր է քաղաքացիներին բողոքի ակցիաների կոչ անել այն ժամանակ, երբ կտեսնի «փոփոխությունների իրական հնարավորություն»։
«Մենք եկանք այն եզրակացության, որ ճիշտ է վերցնել մանդատները և ապահովել մեր ներկայությունը խորհրդարանում»,- ասել է Կարապետյանը։
Միևնույն ժամանակ, նա ընդգծել է, որ դաշինքը չի ճանաչում խորհրդարանում իշխող «Քաղաքացիական պայմանագիր» կուսակցության ներկայացվածության լեգիտիմությունը «այս կազմով»։
Բացի այդ, Կարապետյանը հայտարարել է, որ «Ուժեղ Հայաստանը» մտադիր է ակտիվորեն մասնակցել տեղական ինքնակառավարման մարմինների առաջիկա ընտրություններին։
«Մենք պետք է կտրենք «Քաղաքացիական պայմանագրի» թևերը ՀՀ-ով մեկ։ Երկիրը կանգնած է լուրջ մարտահրավերների առաջ, որոնց դիմակայելու համար անհրաժեշտ է իշխանափոխություն»,- հայտարարել է նա։
Սահմանադրական դատարանի որոշումը, որը հրապարակվել է ընտրությունների արդյունքները վիճարկող յոթ քաղաքական ուժերի դիմումի քննության արդյունքներով, հուլիսի 4-ին ընթերցել է ՍԴ նախագահ Արման Դիլանյանը։
Դիմումները ներկայացվել էին «Ուժեղ Հայաստան» և «Հայաստան» դաշինքների, «Միասնության թևեր», «Դեմոկրատիա, օրենք, կարգապահություն» (ԴՕԿ), «Բարգավաճ Հայաստան», «Հանուն Հանրապետության» և «Նոր ուժ» ռեֆորմիստական կուսակցությունների կողմից։
ԿԸՀ նախագահ Վահագն Հովակիմյանի հայտարարության համաձայն՝ 9-րդ գումարման Ազգային ժողովում ներկայացված կլինի երեք քաղաքական ուժ՝ իշխող «Քաղաքացիական պայմանագիր» կուսակցությունը՝ 64 պատգամավոր, «Ուժեղ Հայաստան» դաշինքը՝ 29 պատգամավոր և «Հայաստան» դաշինքը՝ 12 պատգամավոր:
