Թուրքիայի վարչապետ Էրդողանը վստահեցրել է Ադրբեջանին, որ Անկարան Հայաստանի հետ հարաբերությունները կարգավորելիս՝ չի մոռանա Բաքվին տված խոստումները, հաղորդում է «ՌԻԱ Նովոստին»:
Ավելի վաղ ելույթ ունենալով ադրբեջանական խորհրդարանում՝ նա հայտարարել էր, որ Թուրքիան չի բացի Հայաստանի հետ սահմանը մինչև չլուծվի Լեռնային Ղարաբաղի հակամարտությունը:
«Մենք հավատարիմ ենք Ադրբեջանին տված հայտարարություններին, և դրանցից մեկ քայլ անգամ ետ չենք գնա», - երեքշաբթի ասել է Էրդողանը՝ ելույթ ունենալով Թուրքիայի խորհրդարանում նրա գլխավորած Արդարություն և զարգացում կուսակցության խորհրդարանական խմբակցության նիստին:
«Մենք չենք կատարի որևէ քայլ, որը կարող է անհանգստություն պատճառել մեր ադրբեջանցի եղբայրներին, թող նրանք դրանում չկասկածեն: Մենք ադրբեջանական դրոշը նույնքան սուրբ ենք համարում, որքան թուրքականը, իսկ ադրբեջանական հողերը՝ նույնքան սուրբ, որքան թուրքականը: Ոչ ոք չպետք է փորձության ենթարկի Թուրքիայի անկեղծությունը», - նշել է Թուրքիայի վարչապետը:
Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։
Երկու երկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։
Թուրքիայի մեջլիսը կսկսի քննել ստորագրված փաստաթղթերը հոկտեմբերի 21-ին, երբ պատգամավորներին կդիմի Թուրքիայի ԱԳ նախարար Ահմեդ Դավութօղլուն:-0-
