ՀԿԵ-ն միջազգային ֆինանսական չափանիշների է անցնում

ԵՐԵՎԱՆ, 1 նոյեմբերի. /Նովոստի-Արմենիա/. Հայկական երկաթուղու կոնցեսիոն կառավարում իրականացնող Հարավկովկասյան երկաթուղին հաշվապահական հաշվառումը համապատասխանեցնում է միջազգային չափանիշներին, երկուշաբթի հայտնում է ընկերության մամուլի ծառայությունը։

«Հոկտեմբերի 25-ից նոյեմբերի 6-ը «ՀԿԵ» ՓԲԸ ֆինանսական աշխատակիցները հաշվապահական դասընթացներ կանցնեն, որոնք կազմակերպվել են «ԲԴՕ Յունիկոն» աուդիտորական-խորհրդատվական խմբի կողմից։ Դասընթացների նպատակը որակավորման բարձրացումն է, ինչպես նաև աշխատակիցների պատրաստվածության մակարդակի համապատասխանեցումը միջազգային մակարդակին»,- ասվում է հաղորդագրության մեջ։

Ինչպես նշվում է մամուլի հաղորդագրությունում, քանի որ Հայաստանն անցնում է ֆինանսական հաշվետվության միջազգային չափանիշների (ՖՀՄՉ), ՀԿԵ ղեկավարությունը հաշվապահական հաշվառումը միջազգային չափանիշներին համապատասխանեցնելու մասին որոշում է ընդունել։ Բացի ընկերության ֆինանսական մասնագետների որակավորման բարձրացումից, արդեն նախապատրաստվել և ներդրվում է ՖՀՄՉ համապատասխանող հաշվապահական հաշվառման ծրագիր։

«Բացի այդ, ընկերության ֆինանսական քաղաքականությունը նույնպես կիրականացվի ՖՀՄՉ պայմանները նկատի առնելով։ «ՀԿԵ» ՓԲԸ-ն մտադիր է 2010 թվականն ավարտել արդեն միջազգային ֆինանսական չափանիշների ներդրմամբ».- ասվում է ընկերության հաղորդագրությունում։

«Հայկական երկաթուղու» կոնցեսիոն կառավարումն իրականացնում է «ՀԿԵ» ՓԲԸ-ն՝ «Ռուսական երկաթուղիներ» ԲԲԸ-ի հարյուրտոկոսանոց դուստրը: ՀԿԵ-ն իր բալանսում ընդունել ՀԵ շարժակազմը 2008թ. հունիսի մեկից՝ «Հայկական երկաթուղի» պետական ՓԲԸ-ն 30 տարի ժամկետով փոխանցման, կողմերի փոխադարձ համաձայնությամբ ևս 10 տարի երկարացման իրավունքով 2008թ. փետրվարի 13-ի կոնցեսիոն պայմանագրին համապատասխան։--0—