Ռուս-հայկական հարաբերություններն օրինակելի մոդել են հետխորհրդային տարածքում. ՀՀ ԱԳ նախարար [տարբերակ 1]

ԵՐԵՎԱՆ, 18 օգոստոսի. /Նովոստի-Արմենիա/. Ռուս-հայկական հարաբերությունները ամենահաջող և արդյունավետ օրինակելի մոդելն են հետխորհրդային տարածքում, ասել է ՀՀ ԱԳ նախարար Էդվարդ Նալբանդյանը:

«Հայաստանի և Ռուսաստանի հարաբերությունները պարզապես բարեկամական չեն: Մենք նախապատրաստում ենք Հայաստան ՌԴ նախագահ Դմիտրի Մեդվեդևի պետական այցը, և այն, որ սա պետական այց է, արդեն շատ բանի է ասում: Խոսում է այն մասին, որ մեր հարաբերությունները գտնվում են ամենաբարձր մակարդակի վրա», - ասել է նախարարը «Ռոսիա 24» ռուսական հեռուստաալիքին տված հարցազրույցում:

ՀՀ նախագահ Սերժ Սարգսյանի հրավերով օգոստոսի 19-ին պետական այցով Երևան կժամանի ՌԴ նախագահ Դմիտրի Մեդվեդևը տիկնոջ` Սվետլանա Մեդվեդևայի հետ, հաղորդում է ՀՀ նախագահի մամուլի ծառայությունը:

Այս կապակցությամբ ՀՀ ԱԳ նախարարը հիշեցրել է, որ միայն վերջին երկու տարվա ընթացքում ամենաբարձր մակարդակի վրա շուրջ երկու տասնյակ հանդիպում է կազմակերպվել:

«Երբ մենք ասում ենք, որ ռազմավարական դաշնակիցներ ենք, դրանք պարզապես խոսքեր չեն, չէ՞ որ ռազմավարական գործընկերությունը կամ դաշնակցային գործակցությունը չեն կարող ամուր լինել, եթե չկան խորը կապեր ժողովուրդների միջև, եթե չկա համակրանք և ջերմ վերաբերմունք մարդկանց միջև», - նշել է նա:

Մեջբերելով  «будь друг, но не вдруг» ռուսական առածը՝ Նալբանդյանն ընդգծել է, որ ռուս և հայ ժողովուրդների բարեկամությունը անցել է ժամանակի փորձության միջով:

«Պատմության ընթացքում մեր հայրերն ու պապերը բազմաթիվ անգամ պայքարել են ռազմաճակատներում, այդ թվում նաև՝ Հայրենական մեծ պատերազմում», - ասել է նա՝ ավելացնելով, որ Հայաստանի գրեթե բոլոր մեծահասակ տղամարդիկ մասնակցել են Հայրենական պատերազմի մարտերին:

Միաժամանակ ՀՀ ԱԳ նախարարը նշել է, որ Դմիտրի Մեդվեդևի այցի ընթացքում Հայաստանի և Ռուսաստանի նախագահները կմասնակցեն 19-րդ դարի ռուս-թուրքական պատերազմների ժամանակ զոհված ռուս մարտիկների հիշատակին նվիրված հուշահամալիրի բացմանը:

Ռուս-թուրքական պատերազմների ընթացքում զոհված ռուսական բանակի 156 սպաների մարմինների ամփոփման վայրում կառուցված «Պատվո բլուր» վերականգնված հուշահամալիրի բացման արարողությունը տեղի կունենա Գյումրիում օգոստոսի 20-ին:-0-