Հայաստանում անհամբերությամբ են սպասում Մեդվեդևի այցին. ՌԴ-ում Հայաստանի դեսպան

ԵՐԵՎԱՆ, 30 հունիսի. /Նովոստի-Արմենիա/. ՌԴ-ում ՀՀ արտակարգ և լիազոր դեսպան Օլեգ Եսայանը հայտարարել է, որ Հայաստանում անհամբերությամբ են սպասում ՌԴ նախագահ Դմիտրի Մեդվեդևի այցին:

Ինչպես ակնկալվում է, Մեդվեդևը Երևան կայցելի օգոստոս ամսին:

«Վերջերս Սանկտ Պետերբուրգում կայացած հանդիպումից հետո հայկական կողմը հայտարարել է, որ ստացել է ՌԴ նախագահ Դմիտրի Մեդվեդևի համաձայնությունը, և Ռուսաստանի նախագահի պետական այցը կկայանա: Կարծում եմ, որ առաջիկայում այցը կկայանա, և իմ երկրում շատ ուշադիր, շատ ջերմորեն, շատ անհամբերությամբ են սպասում այդ այցին: Կարծում եմ, որ այդ այցը կդառնա հայ-ռուսական հարաբերությունների զարգացման նոր փուլը», - ասել է Եսայանը «Էխո Մոսկվի» ռադիոկայանին տված հարցազրույցում:

Հայաստանի և Ռուսաստանի նախագահներ Սերժ Սարգսյանի և Դմիտրի Մեդվեդևի հանդիպումը տեղի է ունեցել հունիսի երկրորդ կեսին Սանկտ Պետերբուրգում անցկացվող Միջազգային տնտեսական ֆորումի շրջանակներում:

Նա նշել է, որ հաշվի առնելով հայ-ռուսական հարաբերությունների մակարդակն ու բնույթը` երկկողմ համագործակցության միասնական համակարգը ընդգրկում է համագործակցության բոլոր ոլորտները: «Տնտեսություն, քաղաքականություն, մշակույթ, ռազմաքաղաքական ոլորտ, տարածաշրջանային և միջազգային քաղաքականություն: Եվ բնական է, որ այս բոլոր հարցերը ընդգրկված կլինեն բանակցությունների օրակարգում», - ասել է Եսայանը:

Դեսպանը հույս է հայտնել, որ կքննարկվեն նաև այնպիսի հարցեր, ինչպիսիք են ղարաբաղյան հակամարտության միջազգային-իրավական կարգավորման խնդիրը, երկկողմ տնտեսական և քաղաքական հարցերը, տարածաշրջանային և միջազգային կազմակերպությունների աշխատանքներում երկու երկրների մասնակցության հետ կապված հարցերը, հնարավոր հայ-թուրքական կարգավորումը:

«Այսինքն, կքննարկվեն մեր արտաքին քաղաքականության առավել կարևոր և սկզբունքային հարցերը», - ասել է Եսայանը:-0-