Երևանում ընդդիմության չարտոնված երթի ընթացքում վեց ձերբակալվածներին ազատ են արձակել քաղաքը չլքելու մասին գրությամբ. Ոստիկանություն

ԵՐԵՎԱՆ, 22 փետրվարի. /Նովոստի-Արմենիա/. Երևանում փետրվարի 19-ին ընդդիմության չարտոնված երթի արդյունքում ոստիկանության բաժանմունք բերված վեց անձանց ազատ են արձակել քաղաքը չլքելու մասին գրությամբ, հայտնում է Ոստիկանության մամուլի ծառայությունը:

Հաղորդագրության համաձայն, անցած ուրբաթ, ժամը 18.00-ին, Կորյունի փողոցի թիվ 19 հասցեում գործող ՀԱԿ կուսակցության վարչության շենքի մոտից ՀԱԿ-ի կողմից կազմակերպվել և անցկացվել է չարտոնված երթ` Կորյուն-Աբովյան-Սայաթ-Նովա երթուղով, իսկ կազմակերպիչներից` 1992 թ. ծնված Սարգիս Ղազարյանը, մասնակիցներին կոչ է արել շարունակել երթն ու ղեկավարելով նրանց` նոր մարդկանց է ներգրավել միջոցառման մեջ:

«Երթի ընթացքում մասնակիցները Սայաթ-Նովայի պողոտայի թիվ 6 շենքի մոտ դուրս են եկել փողոցի երթևեկելի մաս` խոչընդոտելով երթևեկությանը»,- ասվում է հաղորդագրության մեջ:

ՀԱԿ-ի երիտասարդական թևը փետրվարի 19-ին նախագահական ընտրությունների երկրորդ տարեդարձին նվիրված երթ է կազմակերպել, որը երկու տարի առաջ բողոքարկել էր ընդդիմությունը:

2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվեցին անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվեց տասը և վիրավորվեց 265 քաղաքացի։-0-