ՀՀ ֆինանսների նախարարությունը շահել է բրեյն-ռինգի «Հայաստանի վարչապետի գավաթը»
ՀՀ ֆինանսների նախարարության թիմը ուրբաթ շահել է բրեյն-ռինգի «Հայաստանի վարչապետի գավաթը»:
Համառ պայքարում ՀՀ ֆինանսների նախարարության աշխատակիցները հաղթանակ են տարել ՀՀ էկոնոմիկայի նախարարության թիմի նկատմամբ՝ դառնալով Վարչապետի առաջին գավաթի դափնեկիր:
«Մեր նպատակն է աջակցել ինտելեկտուալ խաղերի զարգացմանը», - հաղթողների պարգևատության ժամանակ հայտարարել է ՀՀ վարչապետ Տիգրան Սարգսյանն՝ ավելացնելով, որ Գավաթի անցկացումը կդառնա ավանդական:
Վարչապետը նաև տեղեկացրել է, որ Հայաստանում ինտելեկտուալ խաղերը հանրաճանաչ դարձնելու համար 2010 թ.-ին «Արմենիա» հեռուստաալիքը կվերսկսի «Ի՞նչ, որտե՞ղ, ե՞րբ» խաղերի հեռարձակումը:
«Ես շատ եմ ցանկանում, որպեսզի գիտելիքը որպես արժեք կրկին մտնի մեր հասարակություն և որպեսզի բանիմաց մարդկանց ճանաչեն ու գնահատեն», - հայտարարել է ՀՀ կրթության և գիտության նախարար Արմեն Աշոտյանը՝ ընդգծելով, որ հայկական ինտելեկտուալ շարժումն ունի հարուստ ավանդույթներ:
ՀՀ կրթության և գիտության նախարարն անցյալում առաջատար գիտակներից է եղել:
Աշոտյանը լրագրողներին նաև տեղեկացրել է, որ Ինտելեկտուալ խաղերի Հայաստանի հաջորդ առաջնությունը ծրագրվում է անցկացնել Ստեփանակերտում:
Առաջնության հաղորդավար, «Ի՞նչ, որտե՞ղ, ե՞րբ» երևանյան ակումբի փոխնախագահ Տիգրան Քոչարյանը նշել է, որ մասնակիցները մեծ հետաքրքրություն են դրսևորել իրենց գերատեսչություններում նման առաջնությունների անցկացման նկատմամբ:
Նա նաև նշել է, որ չնայած նրան, որ մասնակիցների մեծամասնությունն առաջին անգամ է խաղում, նրանք շատ լավ խաղ ցուցադրեցին, և այսօրվա շատ խաղացողներ կարող էին հանգիստ խաղալ պրոֆեսիոնալ թիմերում:
«Բրեյն-ռինգ» ինտելեկտուալ խաղի «ՀՀ վարչապետի գավաթ» մրցաշարին մասնակցում էին նախարարությունների, կառավարության առընթեր մարմինների թիմերը: Խաղի համակարգողը ՀՀ կրթության և գիտության նախարարությունն է: Այն կազմակերպել է Երևանի «Ի՞նչ, որտե՞ղ, ե՞րբ» ակումբը` «Քաղծառայողների ասոցիացիա» կազմակերպության նախաձեռնությամբ:
