«Այբ» կրթական հիմնադրամը ազգային դպրոց-համայնքի մոդելի հայեցակարգ է մշակել, որը չորեքշաբթի ներկայացրել է հայ գործարարներին:
«Մենք մշակել ենք բավականին լայն հայեցակարգ, և մեզ համար շատ կարևոր է տարբեր ոլորտների ներկայացուցիչների կարծիքը, ինչի կապակցությամբ անցկացնում ենք արդեն երրորդ կլոր սեղանը, այս անգամ` բիզնես ոլորտի ներկայացուցիչների մասնակցությամբ»,- լրագրողներին ասաց «Այբ» հիմնադրամի գործադիր տնօրեն Դավիթ Սահակյանը՝ հստակեցնելով, որ առաջին երկու կլոր սեղաններն անցկացվել են ԶԼմ-ների ղեկավարների և ճարտարապետների հետ:
Նա նշել է, որ գործարարների հետ հանդիպումը այդ ոլորտի ներկայացուցիչների կարծիքն իմանալու նպատակն ունի առ այն, թե որքանով իրական են նրանք համարում դպրոցի այդ մոդելը:
«Դպրոցը, որը մենք պատկերացնում ենք որպես մեր կրթական համակարգի ապագա, մի կառույց է լինելու, որը նպաստելու է երիտասարդ սերնդի ներուժի բացահայտմանը»,- ասաց հիմնադրամի գործադիր տնօրենը:
Նրա խոսքերով` դպրոցի նոր մոդելը կներմուծվի ոչ միայն Հայաստանում, այն կարող է օգտագործվել նաև այն երկրներում, որոնք կցանկանան փոխառել այս դրական փորձը:
«Բիզնես-միջավայրի ներկայացուցիչներից մենք ակնկալում ենք կառուցողական առաջարկներ ընդհանուր կրթության համակրգի արդյունավետ կառավարման վերաբերյալ, ինչպես նաև ֆինանսական կառավարման վերաբերյալ»,- ասաց Սահակյանը:
Բացի այդ գործադիր տնօրենը նշեց, որ կքննարկվի նաև շրջանավարտների հետագա գործի տեղավորման հնարավորության հարցը:
«Այբ» կրթական հիմնադրամի դպրոց-համայնքի ծրագիրը ներկայացվել է ՀՀ նախագահ Սերժ Սարգսյանին ու արժանացել նրա բարձր գնահատականին:
Դպրոց-համայնքի հայեցակարգի թեմայով մի շարք քննարկումները կավարտվեն 2010 թ.-ի հուլիսին եզրափակիչ գիտաժողովով, որի արդյունքում կհաստատվի 21-րդ դարի հայկական ազգային հանրակրթական դպրոցի հայեցակարգը:
Մշակվող հայեցակարգով ստեղծված դպրոցը Հայաստանում միջնակարգ կրթության մակրոհամակարգի զարգացման համար միկրոմոդել կհանդիսանա:
Դպրոցը կսկսի գործել Երևանի ծայրամասերից մեկում` հատուկ դրա համար պետության կողմից տրամադրված տարածքում:
Այնտեղ կկրթվեն 810 երեխաներ Երևանից, Հայաստանի մարզերից և սփյուռքից: Աշակերտների և մանկավարժների ընդունելությունը տեղի կունենա մրցութային կարգով: -0-
