Հայ խաղաղապահները Աֆղանստան կմեկնեն 2010թ. սկզբին. ԱԳՆ

Հայ խաղաղապահների մեկնումը Աֆղանստան նախատեսված է 2010թ. առաջին ամիսներին, ասաց Հայաստանի արտաքին գործերի նախարարի տեղակալ Արման Կիրակոսյանը Աֆղանստանում անվտանգության աջակցության միջազգային ուժերին (ISAF) ներդրում կատարող երկրների արտաքին գործերի նախարարների մասնակցությամբ ՆԱՏՕ-ի նիստի ընթացքում:

«Հայաստանը միջազգային անվտանգությանը և կայունությանը ներդրում կատարելու հստակ մտադրությամբ որոշում է կայացրել զորախումբ տեղակայել Աֆղանստանում»,- ասաց Կիրակոսյանը, տեղեկացնում է Հայաստանի ԱԳՆ մամուլի ծառայությունը։

Այս առնչությամբ Արման Կիրակոսյանը շնորհակալություն է հայտնել Գերմանիայի կառավարությանը համակողմանի աջակցության համար, քանի որ հայ քաղաղապահներն իրենց առաքելությունն իրականացնելու են գերմանական ստորաբաժանման կազմում:

Հայաստանն առաջին անգամ էր մասնակցում նմանատիպ նիստի։ Հայկական պատվիրակությունը ՆԱՏՕ-ի նիստում գլխավորում էր Հայաստանի ԱԳՆ ղեկավարի տեղակալ Արման Կիրակոսյանը։

Ենթադրվում է, որ հայ խաղաղապահների խումբը բաղկացած կլինի 40 հոգուց։

Հայ զինծառայողները հունական գումարտակի կազմում մասնակցում են Կոսովոյում խաղաղապահ առաքելությանը 2004թ.-ի փետրվարի 12-ից: Հայկական վաշտը տեղակայվում է Կոսովոյի հարավում գտնվող Ուրոշևաց քաղաքում։ 2008 թվականից հայկական «երկնագույն բերետների» թիվը Կոսովոյում հասել է մինչև մեկ վաշտի՝ երկու դասակներով (70 մարդ)։

Հայ զինծառայողներն Իրաքում լեհական դիվիզիայի կազմում էին մասնակցում խաղաղապահ առաքելությանը՝ 2005թ.-ի հունվարի 25-ից մինչև 2008թ. հոկտեմբերի 7-ը, երբ վերադարձավ հայ խաղաղապահների վերջին՝ ութերորդ հերթափոխը։ Հայկական համակազմը գործում էր Լեհաստանի կողմից ղեկավարվող Հյուսիս-Հարավ բազմազգ դիվիզիայի հրամանատարության ներքո։ -0-