Հայաստանի կառավարությունը հավանություն չտվեց օտարերկրացիների մասին օրենքում փոփոխություններ կատարելուն
ՀՀ կառավարությունը բացասական եզրակացություն ներկայացրեց ԱԺ պատգամավոր Շիրակ Թորոսյանի՝ «Օտարերկրացիների մասին» օրենքում փոփոխություններ մտցնելու առաջարկին:
Ինչպես հայտարարեց ՀՀ փոխարտգործնախարար Շավարշ Քոչարյանը, Թորոսյանի առաջարկի իմաստն այն է, որ վրացական Սամցխե-Ջավախեթի և Քվեմոքարթլի շրջաններում ապրող հայերի անձնագրերում Հայաստան մտնելիս որևէ գրառում չարվի, և որ նրանք անժամկետ կարողանան ապրել Հայաստանում:
«Պատգամավորն իր այս առաջարկը պայմանավորում է նրանով, որ այդպիսով հնարավոր կլինի դադարեցնել Ջավախքի հայերի արտաքսման գործընթացը:
Քոչարյանի խոսքերով՝ մերժման հիմքում այն է, որ այդպիսով խտրականություն է դրվում Վրաստանի հայերի և Սփյուռքի մյուս մասի հայերի միջև:
«Բացի այդ իրականում կարող է հակառակ գործընթացը սկսվել, և մենք կնպաստենք Ջավախքից հայերի հեռանալուն»,- ընդգծեց փոխնախարարը:
Ջավախքը գտնվում է Հայաստանի, Վրաստանի և Թուրքիայի սահմանների հատման կետում։ Այնտեղ բնակչության գերակշիռ մասը (որոշ տվյալներով՝ 91-ից 97%) հայեր են։ Սամցխե-Ջավախեթի միացյալ երկրամասի բնակչությունը 238 հազար է։--0--
