Երևանում անցկացվում է լրագրողական կրթության հարցերին նվիրված կոնֆերանս

ԵՐԵՎԱՆ, 23 նոյեմբերի. /Նովոստի-Արմենիա/. Երևանի պետական համալսարանի ժուռնալիստիկայի ֆակուլտետի 10-ամյակին նվիրված «Լրագրողական կրթության ապագան Հայաստանում» թեմայով կոնֆերանսն է երկուշաբթի մեկնարկել ԵՊՀ-ում:

Միջոցառման ընթացքում ՀՀ կրթության և գիտության նախարար Արմեն Աշոտյանը կարևորեց կոնֆերանսի անցկացումն ու նշեց, որ լրագրողական կրթությունը ոչ միայն կրթական համակարգի կարևոր մասն է, այլև հասարակության կայացման երաշխիքը:

«Կարելի է ասել, որ Հայաստանում կա կայացած չորրորդ իշխանություն, և ինչպես ցանկացած իշխանությունից՝ նրանից էլ են պահանջում թափանցիկություն և պրոֆեսիոնալիզմ», - ասաց նախարարը:

Նա ընդգծեց, որ ժողովրդավարական երկրներում կարևորագույն արժեքներից է տեղեկատվությունը, և լրագրողները որպես այդ տեղեկատվության սեփականատերեր և տարածողներ՝ պետք է լինեն օբյեկտիվ և պրոֆեսիոնալ:

ՀՀ ժուռնալիստների միության նախագահ Աստղիկ Գևորգյանն իր հերթին նշեց, որ մամուլը ուժ է, որը վերահսկում է և իշխանությունը, և հասարակությունը, ու այդ պատճառով պետք է լինի պրոֆեսիոնալ:

«Հայկական լրագրությունն ունի լավ ավանդույթներ, և մենք պարտավոր ենք դրանք պահպանել: Մենք չենք կարող ստեղծել մեր լրագրության պատշաճ ապագան՝ չհիմնվելով անցյալի փորձի վրա», - ավելացրեց Գևորգյանը:

Կոնֆերանսի կազմակերպիչներն են ԵՊՀ ժուռնալիստիկայի ֆակուլտետը, Երևանի մամուլի ակումբը, «Ինտերնյուս» հասարակական կազմակերպությունն ու «Եվրասիա-համագործակցություն» հիմնադրամը:

Կոնֆերանսին մասնակցում են փորձագետներ, պետական մարմինների ներկայացուցիչներ, ուսանողներ:-0-