ԵՐԵՎԱՆ, 23 սեպտեմբերի. /Նովոստի-Արմենիա/. Հայ-թուրքական հարաբերությունների բարելավման վտանգավոր հետևանքները կարելի է կասեցնել ՀՀ նախագահի հրաժարականի միջոցով, կարծում է ՀՀ առաջին նախագահ, ՀԱԿ առաջնորդ Լևոն Տեր-Պետրոսյանի մամուլի քարտուղար Արման Մուսինյանը:
«Հայ-թուրքական հարաբերությունների նորմալացման և Ղարաբաղյան հակամարտության կարգավորման գործընթացի վտանգավոր հետևանքները հնարավոր չի լինի կասեցնել, եթե տեղի չունենա ՀՀ նախագահ Սերժ Սարգսյանի հրաժարականը»,- ասաց Մուսինյանը չորեքշաբթի մամուլի ասուլիսի ժամանակ:
Նրա խոսքերով, այս երկու գործընթացների վտանգն այն է, որ դրանք սկսեցին շատ արագ ընթանալ:
Բացի այդ Մուսինյանը նշեց, որ ՀՀ իշխանություններն այս երկու խնդիրները միավորել են և այժմ ստիպված են դրան լուծում տալ կարգավորման մեկ փաթեթով, ինչն անընդունելի է:
Մուսինյանը կոչ արեց քաղաքական ուժերին, Հայաստանի մտավորականությանն ու հանրությանը բողոքարկել այդ գործընթացները:
Նա նշեց, որ դեռ անցյալ տարվա հուլիսից ՀԱԿ-ը խոսում է հայ-թուրքական հարաբերությունների նորմալացման վտանգներից, երբ նախագահ Սերժ Սարգսյանը հայտարարեց այն մասին, որ համաձայն է հայ և թուրք պատմաբանների համատեղ հանձնաժողով ստեղծել:
«ՀԱԿ-ը ամբողջ տարին խոսեց այն սպառնալիքների մասին, որոնք կանգնած են ինչպես ԼՂՀ ժողովրդի առաջ Ղարաբաղյան հակամարտության կարգավորման համատեքստում, այնպես էլ Հայաստանի՝ հայ-թուրքական հարաբերությունների կարգավորման համատեքստում»,- ընդգծեց Մուսինյանը:
Հայաստանի և Թուրքիայի միջև բացակայում են դիվանագիտական հարաբերությունները, իսկ 1993 թվականից պաշտոնական Անկարայի նախաձեռնությամբ փակվել է հայ-թուրքական սահմանը:
Թուրքիան առաջ է քաշում մի շարք նախապայմաններ՝ երկկողմ հարաբերությունների հաստատման համար, մասնավորապես, Հայաստանի կողմից Առաջին համաշխարհային պատերազմի տարիներին Օսմանյան կայսրությունում Հայոց ցեղասպանության միջազգային ճանաչման քաղաքականությունից հրաժարվելը, երբ սրի էր քաշվել շուրջ մեկուկես միլիոն հայ, Հայաստանի կողմից Թուրքիայի սահմանների ճանաչումը։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
