Երեկ ողջ գիշեր մարտերը շարունակվել են, չնայած ակտիվությունը որոշակի նվազել է. Հովհաննիսյանն` առաջնագծում տիրող իրավիճակի մասին (ՎԻԴԵՈ)

ԵՐԵՎԱՆ, 5 նոյեմբերի./Նովոստի–Արմենիա/. ՀՀ ՊՆ ներկայացուցիչ Արծրուն Հովհաննիսյանը ներկայացրել է առաջնագծում տիրող իրավիճակը։


«Երեկ ողջ գիշեր մարտերը շարունակվել են, ոչ մի րոպե չեն լռել, չնայած ակտիվությունը որոշակի նվազել է: Մարտերի շարունակումը կախված է նրանից, որ դիվերսիոն խմբերը, որոնք գտնվում են Շուշի քաղաքի մերձակա համայնքներում, անտառներում, ճանապարհներին, ձորակներում և այլուր, փորձում են ամեն կերպ լուծել որոշակի խնդիրներ», – նշեց նա այսօր կայացած ճեպազրույցի ժամանակ:

Նրա խոսքով, առավոտյան մարտերը շարունակվել են ավելի թեժ՝ հրետանու կիրառությամբ:

«Օրվա ընթացքում նաև Ադրբեջանի զինված ուժերը հյուսիսում, հարավային, կենտրոնական ուղղությամբ, Կարմիր շուկայի հատվածում, փոքր գրոհող խմբերով, նվազագույն քանակի զրահատեխնիկայով, հրետանու կրակի աջակցությամբ փորձել են նորից առաջ գալ, հետ են շպրտվել՝ կրելով որոշակի կորուստներ», – ասաց նա:

Հովհաննիսյանը նաև նշեց, որ Շուշիի մերձակա համայնքներում, անտառներում գտնվող դիվերսիոն խմբերը հիմնականում հանդիպելով մեր զինված ուժերի տարբեր ստորաբաժանումների դիմադրությանը, հանգուցային կետերի պահակակետերին, պահպանության ստորաբաժանումներին, երկարատև մարտի չեն բռնվում: Օրվա ընթացքում հաջողվել է մի քանիսին օղակել և ոչնչացնել` կորուստներ կրելով շպրտել տվյալ բնագծերից:–0–