Եգիպտոսում հայտնաբերվել է Հոմերոսի «Իլիականի» հատված պարունակող պապիրուս և հռոմեական դարաշրջանի մումիաներ
ԵՐԵՎԱՆ, 23 ապրիլի․/Նովոստի–Արմենիա/․ Իսպանական հնագիտական արշավախումբը Եգիպտոսի Մինյա նահանգի Էլ-Բահնասա շրջանում բացել է հռոմեական դամբարանադաշտ և պեղումների ընթացքում հայտնաբերել հռոմեական դարաշրջանի մումիաներ, հայտնում է The insider-ը։
Դրանց մի մասը փաթաթված է երկրաչափական նախշերով գործվածքով, իսկ որոշները զետեղված են նկարազարդ փայտե սարկոֆագների մեջ։
Բացի այդ, մի շարք հանգուցյալների բերանում եղել են երեք ոսկե և մեկ պղնձե լեզվակ-ամուլետներ, իսկ առանձին մումիաների վրա արձանագրվել են ոսկե փայլաթիթեղի առկայության հետքեր։
Մումիաներից մեկի մոտ թաղված պապիրուսը պարունակում է Հոմերոսի «Իլիականի» երկրորդ գրքի հատված՝ հայտնի «Նավերի կատալոգը», որտեղ թվարկված են Տրոյայի դեմ պատերազմի մեկնած հունական ուժերը։
Պեղումների ընթացքում հայտնաբերվել է նաև կրաքարե երեք խցիկներից բաղկացած կառույց, որտեղ հայտնաբերվել են մարդկային դիակիզված մնացորդներով անոթներ, մանկան ոսկորներ և կատվի գանգ։
Դամբարանադաշտի հարավային հատվածում հնագետները գտել են տերակոտե ու բրոնզե արձանիկներ, այդ թվում՝ Հարպոկրատ աստծո և Կուպիդոնի պատկերներով։
