9 հավելված տնային հաշվապահությունը վարելու համար

ԵՐԵՎԱՆ, 27 հունվարի./Նովոստի–Արմենիա/. Ժամանակակից աշխարհում օգտագործում են տարբեր հավելվածներ` անձնական բյուջեն պլանավորելու համար։ Համաձայնեք, որ դա շատ ավելի հարմար է` հեռախոսիդ կամ պլանշետիդ մեջ ներբեռնում ես հարմար հավելվածը, իսկ մնացածն արդեն տեխնիկական գործ է։ «Նովոստի–Արմենիա» գործակալությունը ներկայացնում է 9 հավելված, որոնք կօգնեն վարել ձեր անձնական հաշվապահությունը։

1. Bills Monitor



Մենք բոլորս ամեն օր կանոնավոր կերպով վճարում ենք կոմունալ ծառայությունների, ինտերնետի, մարզասրահ այցի համար։ Իսկ կան մարդիկ, ովքեր վճարում են վարձակալության, ինչ–որ դասընթացների մասնակցելու համար։ Կյանքի անդադար ռիթմի պայմաններում երբեմն կարելի է մոռանալ որոշ պարտադիր վճարների մասին։ Բայց ցանկացած վճար ուշացնելու դեպքում կարող են առաջանալ անցանկալի խնդիրներ։ Bills Monitor հավելվածով դուք կարող եք վստահ լինել, որ երբեք չեք մոռանա ժամանակին վճարել բոլոր հաշիվները` միաժամանակ հստակ իմանալով, թե որքան գումար է մնացել դրամապանակում։

2. Money Wallet



Money Wallet–ը կոմբինացված լուծում է, որի միջոցով կարելի է հաշվել ծախսերը համակարգչով (Windows) և վարել տնային հաշվապահությունը բջջայինով (Android)։ Այն չունի յուրահատուկ գործիքներ, բայց հավելվածից օգտվելը պարզ է և հարմար։ Money Wallet–ը միավորում է բոլոր հաշիվները մեկ տեղում, հետևում է բյուջեի վիճակին և ժամանակին հիշեցնում է նախատեսված վճարների մասին։ Այս հավելվածի միջոցով կարելի է վարել տարբեր տեսակի հաշիվներ` կանխիկ, բանկային հաշիվ, վարկային քարտ։ Այն բազմարժութային է, հնարավորություն է տալիս թարմացնել արտարժույթի փոխարժեքը համացանցի միջոցով, ինչպես նաև թույլ է տալիս մշակել շաբաթական, ամսական և տարեկան բյուջեները։

3. Money Lover



Այս հավելվածի միջոցով հնարավոր է հստակ վերահսկել սեփական ֆինանսները։ Այն թույլ է տալիս հետևել ծախսերին, ձևավորել բյուջեն և միշտ տեղեկացված լինել առկա գումարի մասին։ Բացի այդ, հավելվածը կարող է ֆիքսել պարտքային պարտավորությունները և մշտական վճարները, ինչպես նաև հիշեցնել հերթական պարտադիր վճարների մասին։

4. Money Manager



Այս հավելվածը թույլ է տալիս ոչ միայն վերահսկել եկամուտներն ու ծախսերը, այլև ներկայացնում է վիճակագրություն ցանկացած ժամանակահատվածի համար։ Կարևոր գործիքներից են համակարգչից տվյալների հասանելիությունը, կրկնակի գրառման հնարավորությունը, բյուջեն տարբեր կատեգորիաներով պլանավոլերու հնարավորությունը, վարկային և դեբետային քարտերի կառավարումը։

5. Goodbudget



Այս հավելվածի հիմնական տարբերությունն այն է, որ օգտատերը կարող է ինքնուրույն կազմել ամսվա ֆինանսական պլանը։ Այսինքն, պետք է պարզապես նշել, թե որքան ենք պատրաստվում ծախսել ժամանցի, տրանսպորտի, սննդի և այլնի համար, իսկ Goodbudget–ը կհետևի, թե որքան լավ եք կառավարում նշված ծախսերը։

6. Monefy



Monefy–ն ունի պարզ ինտերֆեյս, որը թույլ է տալիս ակնթարթորեն ավելացնել նոր գրառումներ։ Օրինակ, եթե դուք ունեք մի քանի սարք կամ ուզում եք ծախսերին հետևել ամբողջ ընտանիքով, ապա հավելվածում կա սինքրոնացման համակարգ Dropbox–ի միջոցով։ Այս ամպային սերվիսում պահպանվում են տվյալների ռեզերվային օրինակները որևէ խոտանի կամ սմարթֆոնը կորցնելու պարագայում։

Հավելվածը թույլ է տալիս մի քանի քլիքով կատարել ծախսերի և եկամուտների գրառումներ, բացի այդ ներկառուցված հաշվիչը հեշտացնում է ֆինանսների հաշվարկը։ Այստեղ կարելի է բաժանել նաև ծախսերն` ըստ կատեգորիաների, վարել տան հաշվապահությունը տարբեր արտարժույթով, պատճենել և ներբեռնել տվյալները, վերահսկել վարկերը, ամսական և ամենօրյա ծախսերը։

7. Alzex Finance



Հավելվածը հատուկ նախատեսված է ընտանեկան հաշվապահությունը վարելու համար։ Հասկանալի, պարզ ինտերֆեյսը հարմար է նույնիսկ այն մարդկանց, որոնք հեռու են համակարգչից։ Առավել օգտակար գործիքներից են բանկային SMS–ների ճանաչումը, QR կոդի միջոցով չեկերի սկանավորումը, կրկնվող տվյալների մուտքագրումը մեկ քլիքի միջոցով, բազմարժութայնությունը, հաշիվների անսահմանափակ քանակը, ծախսերի պլանավորումն ու վարկերի մարումը, մանրամասն հաշվետվությունն ու բյուջետային նպատակներին հետևելու հնարավորությունը։

8. «Ежедневный бюджет»



Այս հավելվածը հարմար է նրանց, ովքեր խնայատուփի կարիք ունի։ Այն դժվար թե անհրաժեշտ լինի լուրջ պլանավորման համար, բայց հարմար է ամենօրյա ծախսերին հետևելու նպատակով։ Այս հավելվածի միջոցով կարելի է բանաձևով հաշվարկել ամենօրյա բյուջեն` ելնելով ծախսերի և ֆինանսական նպատակների մասով ձեր անձնական պլանից։ Հատկանշական է, որ հավելվածը մշակելիս ներդրվել են խաղային տարրեր, ինչի շնորհիվ կուտակման պրոցեսը վերածվել է հետաքրքրաշարժ խաղի։

9. Moneygraph+



Հավելվածը նախատեսված է գործարարների և այն մարդկանց ֆինանսները վարելու համար, որոնց եկամուտների աղբյուրներն ու չափը մշտապես փոխվում են։ Moneygraph+–ը թույլ է տալիս ստեղծել մի քանի հաշիվ և դրանց միջև փոխանցումներ կատարել, օգտվել ծախսերի կատեգորիաներից, որոնք կան հավելվածում կամ ստեղծել սեփականները, մշակել և պահպանել հաշվետվությունները, OneDrive –ի միջոցով սինքրոնացնել տվյալները մի քանի սարքավորումների միջև։

Նյութը պատրաստվել է ԱՄԻ «Նովոստի–Արմենիա»– ի և ՀՀ կենտրոնական բանկի Սպառողների շահերի պաշտպանության և ֆինանսական կրթման կենտրոնի (www.abcfinance.am) «Ֆինանսական գրագիտություն» համատեղ նախագծի շրջանակում։-0-