Քարտին գումար փոխանցելիս սխալվե՞լ եք, հոգ չէ. ԿԲ–ն պարզաբանում է
ԵՐԵՎԱՆ, 4 մայիսի./Նովոստի–Արմենիա/. Մարդը մեքենա չէ և կարող է սխալվել, ու երբեմն պատահական գումար ուղարկել ուրիշի հաշվին։ Պետք չէ նյարդայնանալ, ամեն ինչ կարելի է ուղղել։ Կենտրոնական բանկը տվել է կոնկրետ պատասխաններ այն մարդկանց հարցերին, ում հետ նման բան է պատահել։
Եվ այսպես.
1. Եթե դուք սխալմամբ գումար եք փոխանցել ուրիշի բանկային քարտին, ո՞ր դեպքերում բանկը կարող է մերժել գործարքը:
– Քարտին փոխանցում անելու համար բավարար է միայն ստացողի քարտի համարը: Ուստի՝ Ձեզ սպասարկող բանկը կմերժի փոխանցում իրականացնել, եթե Ձեր կողմից նշվող բանկային քարտի տվյալները թերի լինեն:
2. Եթե դուք սխալվել եք և գումարն ուղարկել եք անծանոթ մարդու քարտին, Ի՞նչ քայլեր է պետք ձեռնարկել` այդ գումարը ձեր հաշվին վերադարձնելու համար:
– Եթե Դուք և ստացողը նույն բանկի հաճախորդ եք, ապա կարող եք կապ հաստատել Ձեր բանկի հետ և խնդրել, որ վերջինս կապ հաստատի ստացողի հետ և հայտնի սխալմունքի մասին: Իսկ եթե ստացողը այլ բանկի հաճախորդ է, ապա կարող եք անձամբ կամ Ձեր բանկի օգնությամբ դիմել ստացողի բանկին և վերջինիս միջոցով ստացողին հայտնել սխալմունքի մասին:
3. Ազդեցության ի՞նչ մեխանիզմներ են գործում այն անձի նկատմամբ, որին սխալմամբ փոխանցվել է գումարն այն դեպքում, եթե նա հրաժարվում է վերադարձնել գումարը։
– Եթե ստացողը հրաժարվում է վերադարձնել գումարը կամ մերժում է դրա սխալմունք լինելու փաստը, ապա Ձեր իրավունքները կարող եք պաշտպանել դատական կարգով:
