Yerevan Jazz Fest-2016-ի հեդլայները կլինի աշխարհահռչակ երգչուհի Դի Դի Բրիջուոթերը

ԵՐԵՎԱՆ, 1 սեպտեմբերի. /Նովոստի–Արմենիա/. Yerevan Jazz Fest-2016-ի հեդլայները կլինի աշխարհահռչակ երգչուհի Դի Դի Բրիջուոթերը, «Նովոստի–Արմենիա» գործակալությանն ասաց Mezzo Production ընկերության տնօրեն Անի Սաղոյանը։

Yerevan Jazz Fest ամենամյա միջազգային փառատոնը կանցկացվի Հայաստանի մայրաքաղաքում հոկտեմբերի 13–16–ը։ Փառատոնն իր ծավալով, հնչեղությամբ և մասնակիցների քանակով կգերազանցի նախորդ տարվան և կնվիրվի GRAMMY–ի մրցանակակիր Ջորջ Ավագյանին, ով եղել է Մայլզ Դևիսի, Լուի Արմսթրոնգի և Կիտ Ջարետի պրոդյուսերը:

«Փառատոնի ընթացքում ելույթ կունենան աշխարհահռչակ այնպիսի երաժիշտներ, ինչպիսիք են Դի Դի Բրիջուոթերը, Ջոս Սթոունը, Ալինա Ենգիբարյանն և այլոք», – ասել է Սաղոյանը։

Նրա խոսքով` հայազգի մասնակիցների թվում են Լևոն Մալխասյանը, Հայաստանի պետական ջազ նվագախումբը` Արմեն Ուսնունցի գլխավորությամբ և Արմեն Թութունջյանը (Չիկո)։

«Հոկտեմբերի 14–ին նախատեսվում է կազմակերպել բացօթյա համերգ` հայ երաժիշտների մասնակցությամբ», – ասաց Սաղոյանը։

Փառատոնի կազմակերպիչներն են Հայաստանի ջազ ասոցիացիան և Mezzo Production–ը։–0–