ԵՐԵՎԱՆ, 17 հունիսի. /Նովոստի–Արմենիա/. Հանրաճանաչ ռուս կիթառահար Արտյոմ Դերվոյեդը հունիսի 25–ին ելույթ կունենա Երևանում Էդվարդ Միրզոյանի անվան լարային քառյակի հետ, «Նովոստի–Արմենիա» գործակալությանը հայտնեց քառյակի ջութակահար Սոնա Ազարյանը։
Համերգը կանցնի Գաֆեսճյան արվեստի կենտրոնում դասական երաժշտության համերգաշարի շրջանակում։
«Երեկոյի ժամանակ, որը կդառնա մեր քառյակի հետ կիթառահարի երկրորդ համերգը, նախատեսված են ինչպես համատեղ, այնպես էլ անհատական ելույթներ»,– ասաց Ազարյանը։
Նա հայտնեց, որ կիթառահարը Ֆեդերիկո Մորենո Տորոբայի «Իսպանիայի ամրոցները», Մարիո Կաստելնուովո–Տեդեսկոյի «Սատանայական կապրիչո», ինչպես նաև Ջուլիո Ռեգոնդիի «Ինտրոդուկցիա և կապրիս» շարքի կիթառի վեց սոլո–մանրապատումներ կկատարի։
Քառյակի հետ Դերվոյեդը կկատարի Մաուրո Ջուլիանիի «Ռոսինիանա №1»–ը (կիթառի և Ռոլան Դիենսի լարային քառյակի համար) և կիթառի ու լարայինների համար Մասիմո Դիեգո Պուխոլի «Tangata de agosto»–ն։
Հիշեցնելով, որ կիթառահարի առաջին երևանյան համերգն Էդվարդ Միրզոյանի լարային քառյակի հետ համատեղ անցել է 2013 թվականի հոկտեմբերի 8–ին Կամերային երաժշտության տանը` Ազարյանը նշեց, որ այս անգամ երաժիշտը մտադիր է Հայաստանում ավելի երկար մնալ հանգստանալու և տեսարժան վայրերում լինելու համար։
«Բացի այդ, մենք ծրագրում ենք երկրորդ տեսահոլովակի նկարահանումներ, որի գաղափարն առայժմ չի բացահայտվում, և դա անակնկալ կլինի Հայաստանի համար»,– ավելացրեց նա։
Ազարյանը հիշեցրեց նաև, որ 2013 թվականին Երևանի Մնջախաղի պետական թատրոնի գեղարվեստական ղեկավար և ռեժիսոր Ժիրայր Դադասյանը նկարահանել է Էդվարդ Միրզոյանի անվան լարային քառյակի և Արտյոմ Դերվոյեդի առաջին պրոմո–հոլովակը` հայտնի կիթառահար և կոմպոզիտոր Ռոլան Դիենսի «Tango en skai» երաժշտությամբ, որին մասնակցել են Մնջախաղի պետական թատրոնի դերասանները։ Հոլովակը նկարահանվել է «ՊԱՐԳԵՎ» Տարածաշրջանային զարգացման և մրցունակության հիմնադրամի և ֆինանսական աջակցությամբ։
Երաժիշտը մի շարք միջազգային մրցույթների դափնեկիր է, այդ թվում` Ռուսաստանում, Իտալիայում, Ֆրանսիայում, Հունաստանում, Բելգիայում, Գերմանիայում, Պորտուգալիայում, Մալայզիայում, Ճապոնիայում, Իսրայելում և ԱՄՆ–ում։ Կիթառահարի երկացանկն ընդգրկում է վերածննդի ժամանակի երաժշտությունից մինչև ժամանակակից կոմպոզիտորների գրած երաժշտություն, ինչպես նաև կիթառի և նվագախմբի համար գրված ավելի քան 20 համերգ։
Էդվարդ Միրզոյանի անվան լարային քառյակը կազմավորվել է 2013 թվականի ապրիլի սկզբին։ Քառյակի կազմում հանդես են գալիս Արամ Ասատրյանը (ջութակ), Սոնա Ազարյանը (ջութակ), Վահան Գրիգորյանը (թավջութակ) և Արմեն Թորոսյանը (ալտ)։ -0-
