ԵՐԵՎԱՆ, 20 հուլիսի./Նովոստի-Արմենիա/. «Երևանի Մարի Իզմիրլյանի անվան մանկատուն» ՊՈԱԿ-ում խնամվող երեխաները և աշխատակիցները հաղթահարել են կորոնավիրուսի վարակը: Այս մասին հայտնում է ՀՀ աշխատանքի և սոցիալական հարցերի նախարարության մամուլի ծառայությունը:
«Աշխատանքի և սոցիալական հարցերի նախարարության, «Արաբկիր» բժշկական կենտրոնի և «Իզմիրլյան հիմնադրամի» համատեղ ջանքերի արդյունքում մանկատանն այլևս վարակ չկա»,- նշում են նախարարությունից:
Загружается новость ... "Лево"
Հիշեցնենք, որ 2020 թ.-ի հունիսի 8-ին մանկատանն արձանագրվել էր կորոնավիրուսով վարակվածության 13 դեպք՝ 4 աշխատակից և 9 երեխա: Վարակված փոքրիկների և մանկատան աշխատակիցների բուժումն ու խնամքը անմիջապես ստանձնել են «Արաբկիր» բժշկական համալիր – երեխաների և դեռահասների առողջության ինստիտուտը՝ հաշվի առնելով այն հանգամանքը, որ մանկատանը խնամվում են առողջական խնդիրներ կամ հաշմանդամություն ունեցող երեխաներ:
«Մարի Իզմիրլյան մանկատանը COVID 19-ի հետ կապված բժշկական և կանխարգելիչ ծառայությունների մատուցում» ծրագրի շրջանակում «Իզմիրլյան հիմնադրամը» աջակցություն է ցուցաբերել, ընդհանուր առմամբ, 102 երեխաների և 123 աշխատակցի: Ծրագրի անուղղակի շահառուներն են նաև մանկատան անձնակազմի ընտանիքները»,- նշվում է հաղորդագրության մեջ:
Հայաստանում հուլիսի 20-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 34981 դեպք, որոնցից 23502-ն` առողջացած, 650-ը` մահվան ելքով:-0-