ԵՐԵՎԱՆ, 5 մայիսի./Նովոստի-Արմենիա/. ՀՀ Առողջապահության նախարար Արսեն Թորոսյանն անդրադարձել է Հայաստանում կորոնավիրուսի տարածման հավանական բացասական սցենարին, որը « բարեբախտաբար դեռ տեղի չի ունեցել»:
Загружается новость ... "Лево"
«Երեկ խոսեցի կորոնավիրուսային հիվանդության տարածման մի սցենարի մասին, որը բարեբախտաբար դեռ տեղի չի ունեցել։ Եվ մենք պետք է ամեն ինչ անենք, որ այն երբեք տեղի չունենա»,- նշել է Թորոսյանն իր Facebook-յան էջում:
Նա գրառմանը կից հրապարակել է լուսանկար, որտեղ երևում են այդ սցենարի հաշվարկները։
Ըստ այդ բացասական հավանական սցենարի հաշվարկների կորոնավիրուսի դեպքերի ընդհանուր թիվը կկազմի 524.032, որից ծանր՝ 26.202։
«Պահանջվող մահճակալների թիվ պիկի ժամանակ՝ 12.445։ Հիշեցնեմ, որ մենք այս պահին ունենք առանձնացված մոտ 1550 մահճակալ, իսկ ամբողջ երկրի մահճակալային ֆոնդը մոտ 12.000 է»,- նշել է Թորոսյանը:
Հայաստանում մայիսի 5-ի, ժամը 11:00-ի դրությամբ հաստատվել է կորոնավիրուսային հիվանդությամբ ընդհանուր 2619 դեպք, որոնցից 1111-ն` առողջացած: Կորոնավիրուսային հիվանդությամբ այս պահին փաստացի բուժում է ստանում 1462 պացիենտ: Մահացել է, ցավոք, 40 մարդ: -0-