ԵՐԵՎԱՆ, 13 մարտի./Նովոստի-Արմենիա/. ՏՄՊՊՀ-ն օպերատիվ ռեժիմով դիտարկումներ է անում բժշկական դիմակների և ախտահանիչ միջոցների շուկայում՝ կանխարգելիչ միջոցառումների իրականացման և ինֆեկցիոն հիվանդությունների կանխարգելման նպատակով: Այս մասին լրգարողների հետ զրույցում Կորոնավիրուսի տարածումը կանխարգելող հանձնաժողովի փակ նիստից հետո հայտնել է ՏՄՊՊՀ նախագահ Գեղամ Գևորգյանը:
«Մենք ամեն օր դիտարկումներ ենք անում՝ անկախ այս դեպքից։ Ալկոգելի մասով երեկ հանդիպում եմ ունեցել ներքին արտադրողների հետ, օրական 6-7 տոննա ալկոգել է արտադրվում Հայաստանում»,-նշել է նա:
Նրա խոսքով, դիմակների և ալկոգելի դեֆիցիտը կապ ունի մեծ պահանջարկի հետ և տնտեսվարողները չեն հասցնում դրանք մատակարարել դեղատներին:
«Դիմակների գների բարձրացումն էլ պայմանավորված է նրանով, որ ներկրվում էին Ռուսաստանից և Չինաստանից, խնդիր առաջացավ ոչ միայն Հայաստանում, ընդ որում ամբողջ աշխարհում»,- հայտնել է ՏՄՊՊՀ նախագահը:
Գևորգյանը նշել է նաև, որ ախտահանիչների դիֆիցիտ չկա: Ուղղակի խնդիրը կայացել է նրանում, որ արտադրողները չէին կարող պատկերացնել՝ այդ ծավալի պահանջարկ կլինի։
«Հիմա շուկայում, մեծածախի մասին է խոսքը, բժշկական դիմակների գները 150-ից 200 դրամ են։ Նաև փոքր լոկալ արտադրություն են սկսել անել տնտեսվարողները, գինը մոտ 200 դրամ է։ Եթե գնման անհրաժեշտություն լինի, ապա մենք Առողջապահության նախարարության հետ կապի մեջ ենք, տնտեսվարողները ևս կարող են պահանջարկը ապահովել»,- հայտնել է նա։
Հիշեցնենք, որ Հայաստանում այս պահին գրանցվել է կորոնավիրուսով վարակի 6 դեպք։ Առաջինը գրանցվել էր մարտի 1–ի գիշերը, փետրվարի 28–ից Թեհրանից Երևան ժամանած ՀՀ 29–ամյա քաղաքացու կրկնակի թեստը տվել է դրական արդյունք։ 31 մարդ, ովքեր շփվել են հիվանդի հետ, մեկուսացվել են Ծաղկաձորի «Գոլդեն Փելես» հյուրանոցում։ Մարտի 11–ին կորոնավիրուս է ախտորոշվել ՀՀ երկու քաղաքացիների (45 և 27 տարեկան) և Իտալիայի 51–ամյա քաղաքացու մոտ, ովքեր վերադարձել են Իտալիայից։ Նրանցից մեկը ջերմում է և ունի աջակողմյան բազալ թոքաբորբ, որի կապակցությամբ ստանում է ախտանշանային բուժում: Մեկուսացվել է 57 մարդ։ Այնուհետև մարտի 12-ին գրանցվել է կորոնավիրուսով վարակման ևս 2 դեպք: -0-
