ՌԴ ՆԳՆ ղեկավար Ռաշիդ Նուրգալիևը և ԱՊՀ երկրների ՆԳ նախարարները ուրբաթ Սանկտ Պետերբուրգում կքննարկեն թմրանյութերի ապօրինի շրջանառության և մարդկանց առևտրի դեմ պայքարին հակազդելու հարցերը, հաղորդում է ՌԻԱ Նովոստին:
«ԱՊՀ երկրների ներքին գործերի նախարարների խորհուրդը նախկինի պես համագործակցության տարածքում իրավապահ մարմինների հակաքրեական փոխգործակցության առավել արդյունավետ մեխանիզմներից մեկն է», - հինգշաբթի լրագրողներին հայտարարել է Նուրգալիևը:
Նրա խոսքերով՝ խորհրդի նիստի շրջանակներում նախատեսվում է քննարկել համատեղ հետախուզական աշխատանքին և ժամանակակից տեխնիկական միջոցների կիրառմանը, թմրանյութերի ապօրինի շրջանառության դեմ պայքարին, մարդկանց առևտրին հակազդելու գործում ԱՊՀ իրավապահ մարմինների փոխգործակցությանը վերաբերող հարցերը:
Նուրգալիևի խոսքերով՝ նախատեսվում է քննարկել նաև տվյալների միասնական բազայի ստեղծման հարցը:
«Նիստի ընթացքում ընդունված որոշումները թույլ կտան լրացուցիչ ազդակ հաղորդել կոնկրետ ուղղություններով ԱՊՀ մասնակից-պետությունների ներքին գործերի մարմինների փոխգործակցությանը: Եվ հետագայում իրավապահ մարմինները կշարունակեն համագործակցության տարածքում հանցավորությանը համատեղ հակազդելուն ուղղված ջանքերի ավելացման աշխատանքը», - ասել է ՌԴ ՆԳ նախարարը:-0-
