Հայաստանի նախագահին նվիրել են Փրկչի Անձեռակերտ սաթե սրբապատկերը
Կալինինգրադ կատարած այցի շրջանակներում Հայաստանի նախագահ Սերժ Սարգսյանն այցելել է Քրիստոս Փրկչի տաճար։
Ինչպես տեղեկացնում է «Յանտարնի Կրայ- Online Կալինինգրադ» հրատարակությունը, բարձրաստիճան հյուրին ուղեկցել են Կալինինգրադի նահանգապետ Գեորգի Բոոսը, Ռուսաստանի նախագահի՝ Հյուսիս-Արևմտյան դաշնային շրջանի լիազոր ներկայացուցչի տեղակալ, «Քաղաք Կալինինգրադ» քաղաքային շրջանի ղեկավար Ալեքսանդր Յարոշուկը և այլ պաշտոնատար անձինք։
Տաճարում Հայաստանի նախագահին և նրան ուղեկցող անձանց դիմավորել է Բալթիկայի եպիսկոպոս Սերաֆիմը, թեմի հոգևորականությունը և Հայ Առաքելական Եկեղեցու ներկայացուցիչները։
Ճանաչողական էքսկուրսիայի ընթացքում Սերաֆիմ եպիսկպոկոսը Սերժ Սարգսյանին պատմել է Կալինինգրադի գլխավոր ուղղափառ տաճարի կառուցման և օծման պատմությունը, ինչպես նաև տաճարի ներքին՝ Սուվորովյան վանքի պատմաեկեղեցական արժեքի մասին, որը կառուցվել է 18-րդ դարում Ելիզավետա թագուհու հանձնարարությամբ։
Ի հիշատակ տաճար այցի՝ Սերժ Սարգսյանին ընծայվել է Փրկչի Անձեռակերտ սաթե սրբապատկերը։
Հայաստանի նախագահը դիտել է նաև Խաչքարը՝ Հայ Առաքելական եկեղեցու ընծան Կալինինգրադի թեմին՝ 2006 թվականին Կալինինգրադի Փրկչի տաճարի օծման կապակցությամբ։
Հանդիպման ավարտին Սերժ Սարգսյանը ջերմ շնորհակալություն հայտնեց Բալթիկայի եպիսկոպոս Սերաֆիմին էքսկուրսիայի համար և հույս հայտնեց, որ փոխգործակցությունը և համագործակցությունը Ռուս Ուղղափառ և Հայ Առաքելական եկեղեցիների միջև ավելի կամրապնդվի։ -0-
