Ռոբերտ Քոչարյանին վերաբերող գործընթացը իրավականից դուրս է եկել քաղաքական դաշտ. փաստաբան

ԵՐԵՎԱՆ, 31 օգոստոսի․ /Նովոստի-Արմենիա/․ ՀՀ երկրորդ նախագահ Ռոբերտ Քոչարյանին վերաբերող գործընթացը իրավականից դուրս է եկել քաղաքական դաշտ, հայտարարել է փաստաբան Արամ Օրբելյանը։

«Արդեն իսկ գործող իշխանությունները տեղափոխել են քաղաքական դաշտ», - ասաց Օրբելյանը ասուլիսի ժամանակ։

Երկրորդ նախագահի գրասենյակի ղեկավար Բագրատ Միկոյանը հայտարարեց, որ սս արդեն Քոչարյանի չորրորդ կալանավորումն է բացառապես աշխարհաքաղաքական նպատակներով։

Նրա խոսքով` այս անգամ դա հատկապես ակնհայտ էր։

«Եթե նախորդ անգամներն ինչ-որ կերպ քողարկվում էր, այս անգամ պարզ ու ակնհայտ Բաքվից եկող պատվերի ու պայմանների շրջանակում է, որի կետերը ներկա իշխանությունները հնազանդորեն իրականացնում են», - ասաց Միկոյանը։

«Հայաստան» խմբակցության ղեկավար Աննա Գրիգորյանը նույնպես հայտարարեց, որ Ռոբերտ Քոչարյանը ձերբակալվել է քաղաքական դրդապատճառներով։

Ռոբերտ Քոչարյանի նկատմամբ քրեական հետապնդման մասին

Ռոբերտ Քոչարյանն օգոստոսի 27–ին երկու ամսով կալանավորվել է, օգոստոսի 26-ին երկու ամսով կալանավորվել է նրա որդին՝ Սեդրակ Քոչարյանը։ Օգոստոսի 25-ին Ռոբերտ Քոչարյանին և նրա ընտանիքին պատկանող հասցեներում իրականացվել են խուզարկություններ, որից հետո Քոչարյանը տեղափոխվել է Հակակոռուպցիոն կոմիտե։

Հակակոռուպցիոն կոմիտեն հայտնել է, որ քննվող քրեական վարույթի շրջանակում ձերբակալվել է վեց անձ, այդ թվում՝ նախկին նախագահը, նրա որդին և հանցավոր սխեմաներում ներգրավված այլ անձինք։

Այնուհետև Հայաստանի Գլխավոր դատախազությունը հայտնել է, որ օգոստոսի 24-ին հանրային քրեական հետապնդում է հարուցվել երկրորդ նախագահ Ռոբերտ Քոչարյանի նկատմամբ՝ պաշտոնեական լիազորությունների չարաշահման 3 դրվագով, առանձնապես խոշոր չափերով կաշառք ստանալու 2 դրվագով և առանձնապես խոշոր չափերով փողերի լվացման 4 դրվագով։

«Քրեական հետապնդում է հարուցվել ևս 9 անձի նկատմամբ, այդ թվում՝ նրա որդու՝ Սեդրակ Քոչարյանի, պաշտպանության նախկին նախարար Ս.Ս.-ի (2000–2007 թվականներին այդ պաշտոնը զբաղեցրել է Սերժ Սարգսյանը), նախկին վարչապետ Ա.Մ.-ի (2000–2007 թվականներին վարչապետն է եղել Անդրանիկ Մարգարյանը), Երևանի նախկին քաղաքապետ Գ.Բ.-ի (Գագիկ Բեգլարյան) և այլ անձանց նկատմամբ», - նշել է դատախազությունը։