Նախկին գլխավոր դատախազին կփոխարինի նրա տեղակալը. թերթ

ԵՐԵՎԱՆ, 9 սեպտեմբերի. /Նովոստի–Արմենիա/. ՀՀ նոր գլխավոր դատախազը լինելու է գլխավոր դատախազի տեղակալ Արթուր Դավթյանը, հայտնում է «Հայկական ժամանակ» թերթը։

Նա Գևորգ Կոստանյանի հրաժարականից հետո օգոստոսի 4-ին նշանակվել էր գլխավոր դատախազի ժամանակավոր պաշտոնակատար, բայց նույն օրն ազատվեց այդ պաշտոնից, քանի որ ըստ Դատախազության մասին ՀՀ օրենքի պահանջի գլխավոր դատախազի պաշտոնակատար պետք է նշանակվի տեղակալներից տարիքով ավագը, նշում է թերթը։

Պարբերականի տեղեկություններով, Արթուր Դավթյանն ուրբաթ Ազգային ժողովում կհանդիպի խմբակցությունների հետ։ Այնուհետև կկազմակերպվեն նոր գլխավոր դատախազի ընտրությունները։

Թերթը հիշեցնում է, որ նոր Սահմանադրությամբ և «Դատախազության մասին» ՀՀ օրենքով նախատեսված է, որ Գլխավոր դատախազին հանրապետության նախագահի առաջարկությամբ նշանակում Է Ազգային ժոդովը՝ 6 տարի ժամկետով։ Նույն անձը չի կարող ավելի քան երկու անգամ անընդմեջ նշանակվել գլխավոր դատախազ։ -0-