ԵՐԵՎԱՆ, 16 հունիսի. /Նովոստի–Արմենիա/. McDonald's–ը չի ծրագրում իր ռեստորանները բացել Հայաստանում, «Նովոստի–Արմենիա» գործակալության հարցմանն ի պատասխան հայտնել է Եվրոպայում McDonald's–ի ցանցի ռեստորանների մամուլի քարտուղար Ջոնաթան Քոուլզը։
Վերջին մի քանի ամիսներին հայկական ԶԼՄ–ներում պարբերաբար տեղեկություն է ստացվում McDonald's արագ սննդի ամենաճանաչված ցանցի ռեստորանների մոտալուտ բացման մասին։ Հայկական լրատվամիջոցները նախանձելի հաճախականությամբ մեջբերում են վրացի գործարար Թեմուր Ճղոնիայի խոսքն, ով ասել է, թե McDonald's կորպորացիայի գլխավոր գրասենյակից Հայաստանում ռեստորանների ցանց բացելու թույլտվություն է ստացել, և իրեն մնում է միայն համաձայնեցնել հարցը հայկական կառավարության հետ։
Սակայն, ինչպես նախկինում, Հայաստանում McDonald's–ի բացման մասին լուրերը հերքվել են։
«Ինչ–որ երկրում McDonald's բացելու կամ չբացելու հարցը քննարկելիս մենք ուսումնասիրում և վերլուծում ենք տնտեսական և գործարար տարբեր գործոններ։ Ներկայում մենք չենք ծրագրում McDonald's բացել Հայաստանում»,– նշեց Քոուլզը։
Միաժամանակ McDonald's –ի մամուլի քարտուղարը չմեկնաբանեց «Նովոստի–Արմենիային», թե ինչու են հայկական մամուլում վերջին ժամանակում երկու անգամ հայտնվում վրացի գործարարի հայտարարությունը Հայաստանում հայտնի ապրանքանիշի ռեստորանների բացման մասին։
Մնում է միայն գուշակել, թե ինչով է առաջնորդվում Ճղոնիան, նմանատիպ հայտարարություններ անելով, և ինչպես է վրացի գործարարն առհասարակ կապված McDonald's–ի հետ։ Դատելով տեղեկատվության բաց աղբյուրներից` Ճղոնիան «Կոկա–Կոլա Բոթլերս Ջորջիա» ընկերության ղեկավարն է և «Կաստել–Գրուզիա» գարեջրի ընկերության ղեկավարը։
Այնուամենայնիվ, թեև McDonald's–ը հերքել է հայկական շուկա մտնելու լուրերը, «Նովոստի–Արմենիա» գործակալությունը որոշել է հարցնել Հայաստանի կուրորտաբանության ինստիտուտի բժիշկ դիետոլոգ Վարդանուշ Պետրոյանին` պետք է մարդկանց, արդյո՞ք, հերթական ֆաստֆուդը։
«Ոչ մի տեսակի ֆաստֆուդ օգտակար չէ, հատկապես այնպիսին, ինչպիսին McDonald's–ն է»,– կտրականապես ասաց Պետրոսյանը։
Նա ընդգծեց, որ McDonald's–ը գովազդային ագրեսիվ արշավ է վարում և իր ֆաստֆուդը ներկայացնում է որպես առողջ սնունդ, այնուամենայնիվ, հայտնի է, որ այդպիսի ռեստորաններում մատուցվող սնունդը մեծ քանակությամբ աղ և տրանսճարպեր է պարունակում, ինչն այն պարզապես վտանգավոր է դարձնում մարդկային օրգանիզմի համար։
Դիետոլոգի խոսքով, շատ վատ կլինի, եթե Հայաստանում վաճառվող ֆաստֆուդի տեսակներին միանա նաև McDonald's–ը, որը, ամենայն հավանականությամբ, մեծ թվով այցելուներ կգրավի։
«Առավել նախընտրելի է, որ հայերը հիշեն իր ավանդական կերակրատեսակները և ուտեն տնային պայմաններում պատրաստված սնունդ»,– նշեց բժիշկ դիետոլոգը։ -0-
