Հայաստանն ընդլայնում է «Պատիվ ունեմ» ծրագիրը. այն առաջարկվում է ներդնել ԱԱԾ-ում
ԵՐԵՎԱՆ, 21 հուլիսի․/Նովոստի-Արմենիա/․ Հայաստանում առաջարկում են «Պատիվ ունեմ» ծրագիրը ներդնել նաև Ազգային անվտանգության ծառայությունում (ԱԱԾ)՝ բուհերի ուսանողներին հնարավորություն տալով ուսումնառության ընթացքում անցնել ռազմական պատրաստություն, իսկ ուսումն ավարտելուց հետո ծառայության անցնել ԱԱԾ-ում։
Օրենսդրական փաթեթով նախատեսվում է փոփոխություններ կատարել զինվորական ծառայության, Սահմանապահ զորքերի և ազգային անվտանգության մարմինների գործունեությունը կարգավորող մի շարք օրենքներում, հայտնում է «Արմենպրես»-ը։
Ըստ նախաձեռնության՝ ծրագրի մասնակիցները պայմանագիր են կնքելու բուհում ուսումնառության ընթացքում ռազմական պատրաստություն անցնելու և հետագայում ԱԱԾ-ում զինվորական ծառայություն անցնելու վերաբերյալ՝ գերատեսչության սահմանած պայմաններով։
Պարտադիր զինվորական ծառայության զորակոչվելուց հետո նրանք սկզբում ծառայությունն անցնելու են որպես շարքային կազմի զինծառայողներ Պաշտպանության նախարարության համապատասխան ստորաբաժանումներում։ Այնուհետև, պայմանագրի համաձայն, երեք օրվա ընթացքում նրանք տեղափոխվելու են ԱԱԾ և նշանակվելու են սպայական պաշտոնների։
Օրինագծի հիմնավորման մեջ նշվում է, որ նոր մեխանիզմը կոչված է նպաստելու Ազգային անվտանգության ծառայության, մասնավորապես Սահմանապահ զորքերի համալրմանը բարձրագույն կրթություն ունեցող զինծառայողներով։
Փաստաթղթի պարզաբանման մեջ նաև ասվում է, որ ԱԱԾ Սահմանապահ զորքերը նախատեսում են Պաշտպանության նախարարությունից փուլ առ փուլ իրենց հսկողության տակ վերցնել հայ-ադրբեջանական պետական սահմանի ողջ տեղամասի պահպանությունը, ինչը լրացուցիչ անձնակազմ կպահանջի։
