ԵՐԵՎԱՆ, 15 մարտի./Նովոստի-Արմենիա/. Margaryan Business Group ընկերության կազմում գործող ռեստորանները մեկ շաբաթով փակվում են կորոնավիրուսի պատճառով, հայտնել է ընկերության տնօրեն Կարեն Մարգարյանը:
«Արժևորելով մարդկանց առողջությունը և ի բարություն մեր հայրենակիցների՝ որոշում ենք կայացրել մեր ընկերության կազմում գործող «Ոստան», «Ծիրանի տուն», «Չինար», «Hans & Franz», «Alaska by Hans&Franz» և «Louis Charden» ռեստորանները փակել մինչև մարտի 23-ը»,- նշել է նա իր Facebook-յան էջի ուղիղ եթերի ժամանակ:
Մարգարյանը նույնպես հայտնել է, որ իր ընկերներից մեկը՝ վիրաբույժ Արամ Սահակյանը, նախաձեռնությամբ է հանդես եկել, որտեղ առաջարկվում է կարգավորել նոր ինֆեկցիոն հիվանդանոցում հատուկ ռեժիմով աշխատող բուժանձնակազմի համար սննդի մակատակարարման հարցը:
«Տեղեկացանք, որ կառավարությունը հատկացումներ է կատարել այս հարցը կարգավորելու համար, բայց կարծում եմ, որ բոլորիս օգնության կարիքը կա: Ես, լինելով «Margaryan Business Group» ընկերության տնօրեն, մեր ընկերության կազմում 7 ռեստորանով, «Բեկոն Մսամթերքը» և «Զատիկ» հրուշակեղենի արտադրությունը ևս միացել ենք այս նախաձեռնությանը»,- հայտնել է նա:
Մարգարյանը նշել է, որ արդեն շուրջ 40 անձի անձնակազմի համար սննդի առաջին առաքման հարցը լուծվել է, բայց «հասկանալով, որ չենք կարող ասել, թե ինչքան կձգձվի այս հարցը», կա այլ ընկերությունների օգնության կարիքը ևս: Մարգարյանը կոչ է արել իր ընկերներին և գործընկերներին, եթե ցանկություն կա, միանալու այս նախաձեռնությանը: -0-