Կաթողիկոսի և վեց եպիսկոպոսների գործը կուղարկվի Երևանի առաջին ատյանի ընդհանուր իրավասության քրեական դատարան
ԵՐԵՎԱՆ, 28 օգոստոսի․ /Նովոստի–Արմենիա/․ Ամենայն Հայոց Կաթողիկոս Գարեգին Բ-ի և վեց եպիսկոպոսների գործը կուղարկվի Երևան քաղաքի առաջին ատյանի ընդհանուր իրավասության քրեական դատարան, հայտնել է դատավոր Սերժ Ռուշանյանը։
Գործով հերթական դատական նիստը տեղի է ունեցել այսօր դատարանի Վաղարշապատի նստավայրում՝ Էջմիածնում։
Ռուշանյանը որոշում է կայացրել գործը փոխանցել Երևան քաղաքի ընդհանուր իրավասության առաջին ատյանի քրեական դատարան՝ այն քննելու և Արմավիրի դատարանում գործի քննության նպատակահարմարությունը որոշելու համար։
Ամենայն Հայոց Կաթողիկոս Գարեգին Բ-ն և վեց եպիսկոպոսները նիստին ներկա չեն եղել։
Դատավորը մերժել է կարգալույծ արված եպիսկոպոս Գևորգ Սարոյանի միջնորդությունը՝ դատական նիստերը դռնփակ անցկացնելու վերաբերյալ։
Ավելի վաղ գործը գտնվում էր դատավոր Հակոբ Մանուկյանի վարույթում, սակայն օգոստոսի 7-ին կայացած առաջին նիստին նա ինքնաբացարկ է հայտնել, ինչի կապակցությամբ գործը մակագրվել է այլ դատավորի:
Ամենայն Հայոց Կաթողիկոս Գարեգին Երկրորդին և Գերագույն հոգևոր խորհրդի վեց անդամներին (երկու արքեպիսկոպոսի և չորս եպիսկոպոսի) մեղադրում են Մասյացոտնի թեմի նախկին առաջնորդ Գևորգ Սարոյանի գործով դատական ակտի կատարմանը խոչընդոտելու մեջ:
Գարեգին Բ-ին մեղսագրվում է ՀՀ քրեական օրենսգրքի 507-րդ հոդվածի 2-րդ մասով նախատեսված արարք՝ ծառայողական լիազորությունների օգտագործմամբ օրինական ուժի մեջ մտած դատական ակտի կատարմանը խոչընդոտելը։ Նույն մեղադրանքն առաջադրված է նաև Նաթան արքեպիսկոպոս Հովհաննիսյանին, Հայկազուն արքեպիսկոպոս Նաջարյանին, Վահան եպիսկոպոս Հովհաննիսյանին, Մակար եպիսկոպոս Հակոբյանին, Մուշեղ եպիսկոպոս Բաբայանին և Հովնան եպիսկոպոս Հակոբյանին։
Ըստ ՀՀ Քրեական օրենսգրքի 507-րդ հոդվածի («Դատական ակտը չկատարելը կամ դրա կատարմանը խոչընդոտելը»), նման արարքը պատժվում է տուգանքով՝ առավելագույնը 20-ապատիկի չափով, կամ հանրային աշխատանքներով՝ 80-150 ժամ տևողությամբ, կամ ազատության սահմանափակմամբ` առավելագույնը 2 տարի ժամկետով, կամ կարճաժամկետ ազատազրկմամբ` առավելագույնը 2 ամիս ժամկետով, կամ ազատազրկմամբ՝ առավելագույնը 2 տարի ժամկետով:
