ԵՐԵՎԱՆ, 14 մարտի./Նովոստի-Արմենիա/. Հայաստանում հաստատվել է կորոնավիրուսով վարակման 20 դեպք: Այս մասին հայտնել է ՀՀ առողջապահության նախարար Արսեն Թորոսյանը:
«Եվս 14 տեստի պատասխաններից 12-ը բացասական են, իսկ 2-ը դրական: Վերջիններս կրկին կապված են «Էջմիածնի» դեպքի հետ»,- նշել է Թորոսյանը՝ լուսանկար հրապարակելով իր Facebook-յան էջում:
«Այս պահին ունենք հաստատված 20 դեպք` հույս ունենալով, որ վաղը կունենք վերջնական բուժված 1 պացիենտ»,- հայտնել է նա:
Հիշեցնենք, որ Հայաստանում այս պահին գրանցվել է կորոնավիրուսի վարակման 20 դեպք։ Առաջինը գրանցվել էր մարտի 1–ի գիշերը, փետրվարի 28–ից Թեհրանից Երևան ժամանած ՀՀ 29–ամյա քաղաքացու կրկնակի թեստը տվել է դրական արդյունք։ 31 մարդ, ովքեր շփվել են հիվանդի հետ, մեկուսացվել են Ծաղկաձորի «Գոլդեն Փելես» հյուրանոցում։ Մարտի 11–ին կորոնավիրուս է ախտորոշվել ՀՀ երկու քաղաքացիների (45 և 27 տարեկան) և Իտալիայի 51–ամյա քաղաքացու մոտ, ովքեր վերադարձել են Իտալիայից։ Նրանցից մեկը ջերմում է և ունի աջակողմյան բազալ թոքաբորբ, որի կապակցությամբ ստանում է ախտանշանային բուժում: Մեկուսացվել է 57 մարդ։ Այնուհետև մարտի 12-ին գրանցվել է կորոնավիրուսով վարակման ևս 2 դեպք: Նախօրեին` մարտի 13–ին, հայտնի դարձավ վարակման ևս 2 դեպքի մասին։ Իսկ այսօր հայտնի է դարձել վարակման ևս 7 դեպքի մասին:-0-