ՀՀ երկրորդ նախագահի առանձնատան վրա հարձակման մեջ մեղադրվողը չէր գիտակցում իր գործողությունները. ՔԿ

ԵՐԵՎԱՆ, 19 մայիսի. /Նովոստի-Արմենիա/. ՀՀ երկրորդ նախագահ Ռոբերտ Քոչարյանի առանձնատան բակի մուտքի մոտ ուսումնական նռնակ նետած Հովհաննես Մուրադյանը ստացիոնար դատահոգեբուժական փորձաքննություն է անցել, հաղորդում է ՀՀ Քննչական կոմիտեի մամուլի ծառայությունը:

Եզրակացության համաձայն՝ Մուրադյանը տառապել և տառապում է «Շիզոֆրենիա պարանոիդ ձև» հոգեկան հիվանդությամբ և ինչպես իրավախախտումը կատարելիս, այնպես էլ ներկայում նա չէր կարող ու չի կարող գիտակցել իր գործողությունների վտանգավորությունը և ղեկավարել դրանք։

Հետաքննության տվյալների համաձայն, 32-ամյա Հովհաննես Մուրադյանը 2016 թվականի ապրիլի 15-ին ժամը 18:25-ի սահմաններում, իր հոր անվամբ հաշվառված ավտոմեքենայով, մոտեցել է ՀՀ երկրորդ նախագահ Ռոբերտ Սեդրակի Քոչարյանի առանձնատան բակի գլխավոր մուտքին և ուսումնական նռնակ նետել առանձնատան պահակակետի ուղղությամբ՝ խաթարելով ծառայություն իրականացնող պետական պահպանության աշխատակիցների աշխատանքը։

Բացի այդ, Հ.Մուրադյանի բնակարանում, օրենքով սահմանված կարգով, ապրիլի 18-ին կատարված խուզարկությամբ նրա անձնական իրերի մեջ հայտնաբերվել և առգրավվել է զգալի չափերի «տետրահիդրոկաննաբինոլ» տեսակի թմրամիջոց:

Ձեռք բերված ապացույցների համակցությամբ՝ ապրիլի 20-ին Հ.Մուրադյանին մեղադրանք է առաջադրվել՝ ՀՀ քրեական օրենսգրքի 258-րդ հոդվածի 1-ին մասով (խուլիգանություն) և 268-րդ հոդվածի 1-ին մասով (առանց իրացնելու նպատակի թմրամիջոցներ կամ հոգեներգործուն նյութեր ապօրինի պատրաստելը, վերամշակելը, ձեռք բերելը, պահելը, փոխադրելը կամ առաքելը):

Նույն օրը որոշում է կայացվել՝ անմեղսունակության վիճակում քրեական օրենքով արգելված արարք կատարած անձին հոգեբուժական հիվանդանոցում տեղավորելու մասին, որը հաստատվել է դատարանի կողմից:

Փորձագետների գնահատմամբ՝ մեղսագրվող արարքի նկատմամբ Հ.Մուրադյանին հարկ է ճանաչել անմեղսունակ, ներկա հոգեկան վիճակով նա չի կարող մասնակցել դատաքննչական գործողություններին, սոցիալապես վտանգավոր է ինչպես իր, այնպես էլ՝ շրջապատի համար, կարիք ունի հարկադիր բուժման՝ հատուկ հսկողության հոգեբուժական բաժանմունքի պայմաններում։

Այս կապակցությամբ 2016թ. մայիսի 13-ին որոշում է կայացվել՝ Հովհաննես Մուրադյանի նկատմամբ բժշկական բնույթի հարկադրական միջոցներ կիրառելու վարույթ հարուցելու մասին: Նա տեղափոխվել է «Նուբարաշեն հոգեբուժական բժշկական կենտրոն»-ի հատուկ հսկողության բաժանմունք։ -0-