Խուզարկություններ՝ Ռոբերտ Քոչարյանի և նրա ընտանիքին պատկանող հասցեներում․ Ռոբերտ Քոչարյանը տեղափոխվել է Հակակոռուպցիոն կոմիտե (ՎԻԴԵՈ)
ԵՐԵՎԱՆ, 25 օգոստոսի․/Նովոստի-Արմենիա/․ Առավոտյան 07:00-ի սահմաններում իրավապահները ներխուժել են ԱԺ պատգամավոր Լևոն Քոչարյանի տուն։
Այս մասին Facebook-յան իր էջում հայտնել է «Հայաստան» խմբակցության պատգամավոր Մեսրոպ Մանուկյանը՝ հրապարակելով տեսանյութ։
«Սա այն պարագայում, որ տանը երեք անչափահաս երեխաներ կան, զուտ ուզում եմ ԱԺ համակարգը գնահատել, մնացածին ավելի ուշ կանդրադառնամ»,-ասել է նա։
«Առավոտյան Նախագահ Քոչարյանին քննչական մարմինները տեղափոխել են Հակակոռուպցիոն կոմիտե: Երեկ մամուլում տեղ գտած լուրերը հաստատվեցին. իշխանությունների հերթական գրոհն է սկսվել նախագահ Քոչարյանի և իր ընտանիքի նկատմամբ»,-նշվում է ՀՀ երկրորդ նախագահ Ռոբերտ Քոչարյանի գրասենյակի ղեկավարի հայտարարության մեջ։
ՀՀ Հակակոռուպցիոն կոմիտեն էլ հայտնել է, որ քրեական վարույթի շրջանակում խուզարկություններ և վարութային այլ գործողություններ է կատարում։
«Հայաստանի հակակոռուպցիոն կոմիտեն կոռուպցիոն բնույթի հանցագործությունների դեպքերով քննվող քրեական վարույթի շրջանակում խուզարկություններ և վարութային այլ գործողություններ է կատարում ՀՀ երկրորդ նախագահ Ռոբերտ Քոչարյանին և նրա ընտանիքի անդամներին պատկանող մի քանի տասնյակ հասցեներում»,-նշվում է կոմիտեի տարածած հաղորդագրության մեջ։
ՀՀ Քննչական կոմիտեն էլ իր հերթին հայտնել է, որ քրեական վարույթի շրջանակում քննչական և վարութային գործողություններ են իրականացվում «Օրանժ ֆիթնես» ակումբում և «Փլեյ սիթի» զվարճանքի կենտրոնում, տնօրենների բնակարաններում։
