ԵՐԵՎԱՆ, 26 սեպտեմբերի. /Նովոստի–Արմենիա/. Հայաստանի վարչապետ Կարեն Կարապետյանը մտադիր է դուրս բերել երկիրը ճգնաժամից և պատրաստվում է վճռական քայլերի դիմել, կարծում է Հայաստանի հայրենական ապրանքարտադրողների միության ղեկավար Վազգեն Սաֆարյանը։
«Բարեփոխումների հանդեպ իր կամքի մասին են վկայում նախարարների նրա առաջին նշանակումները, նախարարությունների կառուցվածքային փոփոխությունները, ինչպես նաև պետական բյուջեի միջոցները չարաշահելու դեմ պայքարը: Կարապետյանը նաև հայտարարել է բյուջեի ծախսերը կրճատելու և եկամուտներն ավելացնելու հարցերում վճռական քայլերի անհրաժեշտության մասին», - երկուշաբթի լրագրողներին է ասել Սաֆարյանը, հաղորդում է «ԱՌԿԱ» գործակալությունը:
Նրա խոսքով, նոր նախարարների նշանակումները ցույց տվեցին, որ Կարապետյանն ազատ է իր ընտրության մեջ, քանի որ կառավարության նորանշանակ անդամները պաշտոնյաների շրջանում հեղինակություն են վայելում: Այդպիսով, Սաֆարյանը նշել է, որ վարչապետի առաջին քայլերը հասարակության շրջանում դրական սպասումներ են առաջացրել:
«Շաբաթ օրը կայացել է ՀՀ վարչապետի հանդիպումը Հասարակական խորհրդի անդամների հետ: Ակնհայտ է, որ Կարապետյանը լավ մենեջեր է և ցանկացած հարց գնահատում է արդյունավետության տեսանկյունից: Քննարկված բոլոր հարցերի հետ կապված նա առաջարկում է կոնկրետ բիզնես ծրագրեր ներկայացնել», - ասել է Սաֆարյանը:
Կառավարության ղեկավարի հետ հանդիպման ժամանակ քննարկված փոքր և միջին բիզնեսի հիմնական խնդիրների մեջ Սաֆարյանը ներառել է վարկային բարձր տոկոսադրույքները, ՓՄՁ համապատասխան ոլորտներում զարգացման առումով խոշոր համակարգաստեղծ գործարանների գործունեության անարդյունավետությունը, արտադրության ոլորտում հայ օլիգարխների միջոցների չմասնակցելը: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
