Ղարաբաղից ավելի քան 45 հազ. տեղահանված արդեն ստացել է ՀՀ քաղաքացիություն․ ՆԳՆ-ն նշել է հիմնական դժվարությունները

ԵՐԵՎԱՆ, 13 հոկտեմբերի․ /Նովոստի-Արմենիա/․ Ղարաբաղից տեղահանված ավելի քան 53 հազար անձ Հայաստանի քաղաքացիություն ստանալու դիմում է ներկայացրել, որոնցից ավելի քան 45 հազարն արդեն ստացել է քաղաքացիություն, երեքշաբթի կայացած ճեպազրույցում հայտարարել է ՀՀ ՆԳ նախարարի տեղակալ Արմեն Ղազարյանը։

Հիմնական խնդիրները կապված են քաղաքացիություն ստանալու հետ

Ինչպես նշել է Ղազարյանը, երեքշաբթի Ազգային ժողովում տեղի ունեցած քննարկման ժամանակ, որը վերաբերում էր Ղարաբաղից տեղահանված անձանց խնդիրներին, քննարկվել են Հայաստանի քաղաքացիություն ստանալու ընթացակարգերը, փոխանցում է «Արմենպրեսը»։

Փոխնախարարի խոսքով՝ գերատեսչությունն աշխատում է վարչարարական ընթացակարգերի պարզեցման ուղղությամբ։

«Քննարկման ընթացքում, մասնավորապես, բարձրացվել է անհրաժեշտ փաստաթղթերի, այդ թվում՝ ծննդյան վկայականների բացակայության հարցը։ Առանց ծննդյան վկայականի քաղաքացիության շնորհման գործ չի կարող լինել, և դա տրամաբանական կառուցակարգ է՝ նախատեսված քաղաքացիության մասին մեր օրենսդրությամբ։ Ուստի քննարկում ենք և լուծումներ ենք փնտրում», - հայտարարել է Ղազարյանը։

Ինչ լուծումներ կան

Փոխնախարարի խոսքով՝ արդեն կիրառվում է ծննդյան փաստի հաստատման նոտարական ընթացակարգը։ Այն դատական ընթացակարգի համեմատ ավելի պարզեցված տարբերակ է։

Բացի այդ, Արդարադատության նախարարությունը նաև նախաձեռնել է տուրքերից ազատման վերաբերյալ օրենսդրական փոփոխություն։

«Մենք ունենք դեպքեր, երբ մարդիկ գնում են, իրենց ծննդյան փաստը հաստատում են նոտարի մոտ», - նշել է Ղազարյանը՝ ընդգծելով քաղաքացիներին նման հնարավորության մասին իրազեկելու կարևորությունը։

Դիմումի քննարկման ժամկետը՝ մինչև 90 աշխատանքային օր

Ղազարյանը պարզաբանել է նաև քաղաքացիություն տրամադրելու մասին դիմումների քննարկման ժամկետները։ Նրա խոսքով՝ վարչական վարույթը սկսվելու պահից այդ ժամկետը չի կարող գերազանցել 90 աշխատանքային օրը։

«Եթե մենք ունենում ենք նմանատիպ ժամկետի խախտումներ, ես կարող եմ ձեզ վստահեցնել, որ այդ խախտումները եզակի են», - հավելել է փոխնախարարը։

Նա պարզաբանել է, որ փաստաթղթերի հավաքման փուլը չի համարվում վարչական վարույթի մեկնարկ։ Ըստ նրա՝ 90 աշխատանքային օրվա հաշվարկը սկսվում է դիմումը ներկայացնելուց և համապատասխան վարույթի մեկնարկից։

Առաջարկվող լուծումները, Ղազարյանի խոսքով, նպատակ ունեն դյուրացնել նաև դիմելուն նախորդող՝ փաստաթղթերի հավաքման և փաստի հաստատման փուլը։