ԵՐԵՎԱՆ, 17 հուլիսի. /Նովոստի–Արմենիա/. Հայաստանի պաշտպանության նախկին նախարար Վաղարշակ Հարությունյանը կարծում է, որ Երևանի ոստիկանական բաժանմունքը զավթած մարդկանց գործողությունները թուլացնում են պետության հիմքերը։
Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց։
Որոշ տեղեկություններով` զինված անձինք «Հիմնադիր խորհրդարան» արմատական ընդդիմադիր կազմակերպության կալանավորված առաջնորդ Ժիրայր Սեֆիլյանի կողմնակիցներն են, ովքեր պահանջում են ազատել նրան։
Մեկ ոստիկան սպանվել է, ևս երկուսը` վիրավորվել, պատանդներից երկուսը ազատվել են. ԱԱԾ>>
«Պատերազմական իրավիճակում, երբ Ղարաբաղի շուրջ բանակցային գործընթաց է ծավալվում, նման քայլերը ցանկացած դեպքում վնասակար են»,– ասել է Հարությունյանն «Արմենիա TV» հեռուստաալիքի եթերում։
Ըստ նրա, այդ գործողությունները թուլացնում են պետության հիմքերը և խրախուսում են Ադրբեջանին պատերազմ ծավալելու նրա նկրտումներում։
«Մեր հասարակությունը պետք է ճիշտ գնահատի իրավիճակը և չգնա ինչ–որ քայլերի, որոնք կարող են մեզ վնասել։ Պետք է հասկանալ, թե ինչ է կանգնած դրա հետևում։ Դա, նախևառաջ, ուղղված է ժողովրդի և հասարակության դեմ»,– նշել է Պաշտպանության նախարարության նախկին ղեկավարը։ -0-
