Երևանի բնակիչները պատրաստ են տեսակավորել աղբը

ԵՐԵՎԱՆ, 5 հունիսի. /Նովոստի–Արմենիա/. Երևանի բնակիչները պատրաստ են տեսակավորել կենցաղային թափոնները` շրջակա միջավայրի աղտոտումից խուսափելու համար, ասաց «Հանուն կայուն մարդկային զարգացման» ասոցիացիայի ղեկավար, Խ. Աբովյանի անվան պետական մանկավարժական համալսարանի «Բնապահպանության և կայուն զարգացման» ամբիոնի վարիչ, բնապահպան Կարինե Դանիելյանը։

«Մայրաքաղաքի բնակիչների բնապահպանական գիտակցության մակարդակը վերջին տարիներին նկատելիորեն բարձրացել է»,– երկուշաբթի ասաց նա մամուլի ասուլիսում։

Ինչպես նշեց բնապահպանը, 90–ականների սկզբին Հայաստանի բնակչության շրջանում հարցում էր անցկացվել այն մասին, թե պատրաստ են նրանք, արդյո՞ք, ինքնուրույն տեսակավորել կենցաղային թափոնները և թափել դրանք տարբեր արկղեր, եթե երկրում ստեղծվի աղբամշակող գործարան, հարցվածների 90 տոկոսը կտրուկ բացասական պատասխան էր տվել։

«Այս տարի Երևանում իրավիճակն արմատապես փոխվել է»,– ասաց Դանիելյանը։


Նրա խոսքով, 2017 թվականին բնապահպանը և նրա մոտ դիպլոմային աշխատանք գրողները կրկին նմանատիպ հարցում են անցկացրել, որին դրական պատասխան է տվել Երևանի հարցվածների արդեն 70 տոկոսը` վկայակոչելով եվրոպական երկրների փորձը։

Դանիելյանը, սակայն, ավելացրել է նաև, որ գյուղերում իրավիճակն այդքան էլ լավատեսական չէ։

Կառավարության ապրիլյան նիստերից մեկի ժամանակ Հայաստանի վարչապետ Կարեն Կարապետյանն առաջարկել է քրեական պատասխանատվության ենթարկել արգելված վայրերում աղբ թափելու համար։ Կառավարության ղեկավարը հանձնարարել է արդարադատության նախարարին երկու ամսվա ընթացքում համապատասխան օրենսդրական առաջարկներ ներկայացնել, որոնք նախատեսում են պատասխանատվության ենթարկման ավելի կոնկրետ նորմեր` խստացնելով առաջարկվող վարչական տուգանքները։

Նա նաև հանձնարարել է մի շարք գերատեսչությունների ղեկավարներին քայլեր ձեռնարկել աղբահանության և սանիտարական մաքրման աշխատանքների պատշաճ իրականացման համար։ -0-