ԵՐԵՎԱՆ, 1 հուլիսի./Նովոստի-Արմենիա/. Գիտությունների ազգային ակադեմիայի Մոլեկուլային կենսաբանության ինստիտուտում արդեն արտադրվել են կորոնավիրուսի 6 հազ. թեստերը: Այս մասին չորեքշաբթի առցանց ասուլիսի ժամանակ հայտնել է Ինստիտուտի տնօրեն Արսեն Առաքելյանը:
Загружается новость ... "Лево"
Թեստերի ստեղծման շուրջ աշխատանքները մեկնարկել եմ մարտի կեսերից ունեցած գրականության վերլուծությունից և հնարավոր տարբերակների մշակումից: Այս նպատակով ՀՀ կառավարությունն Ինստիտուտին տրամադրել էր 550 հազ. դոլարի չափով դրամաշնորհ: Իսկ թեստերի մշակումը սկսվել է անմիջականորեն մայիսի 14-ից հետո, երբ ինստիտուտը ստացել է անհրաժեշտ նյութերը: Թեստերի ստեղծման և ներքին փորձարկումների համար պահանջվել է կես ամիս:
Առաքելյանը նշել է, որ Գիտությունների ազգային ակադեմիայի Մոլեկուլային կենսաբանության ինստիտուտում սպասում են ՀՀ առողջապահության նախարարության պաշտոնական գրությանը, որից հետո դրանք կտրամադրվեն։ Թեստերի փորձաքննությունն անցկացրել է Հիվանդությունների վերահսկման և կանխարգելման ազգային կենտրոնը:
«Նախատեսվում է, որ օրական կկարողանանք արտադրել 2000 թեստ, եթե կարիք լինի, մենք կկարողանանք ավելի մեծ ծավալներով արտադրել: Ներկա պահին արդեն արտադրվել է 6 հազ. թեստ, որոնք կարող ենք միանգամից տրամադրել»,- նշել է Առաքելյանը:
Ինչպես հայտնել է ինստիտուտի տնօրենը, նեղ լաբորատոր մի քանի փորձարկումների արդյունքներով՝ հայկական արտադրության թեստերի ճշտությունը հասնում է 98-100%-ի:
Ինչ վերաբերում է հայկական արտադրության թեստերի գներին, թեստերի գինն էապես ցածր է՝ այլ երկրների թեստերի համեմատ։
Ինստիտուտը ՀՀ Կառավարությունից ստացած 250․000 ԱՄՆ դոլարն օգտագործել է 100․000 թեստի մատակարարման համար։
Փաստորեն, մեկ թեստի արժեքը 2․5 ԱՄՆ դոլար է, մինչդեռ շուկայի հետազոտությունը ցույց է տվել, որ մեկ թեստի միջին արժեքը 10 դոլար է։
Խոսելով հայկական արտադրության թեստերի արտահանման մասին, նրա խոսքով, արտադրության ընթացքում ինստիտուտը սերտորեն համագործակցել է արտասամանյան գործընկերների հետ։ Առայժմ արտահանման հարց ընդհանրապես չի քննարկվում․
«Թեստերը, որ մենք արտադրում ենք, պետք է անցնեն բավական երկար սերտիֆիկացիայի և գրանցման փուլ։ Հայաստանում այս պահին այդ օրենսդրությունը չի գործում»,- նշել է Առաքելյանը:
Միաժամանակ, նա նաև հայտնել է, որ հակամարմինների թեստեր ստեղծելու ներուժ նույնպես ունեն, սակայն, իր խոսքով, այս պահին ավելի վճռորոշ է ՊՇՌ (պոլիմերազային շղթայական ռեակցիա) թեստեր ունենալը։
Հայաստանում հուլիսի 1-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 26065 դեպք, որոնցից 14563-ն` առողջացած, 453-ը` մահվան ելքով:-0-
