Կորոնավիրուսից 2 մահվան դեպք է արձանագրվել. ԱՆ-ն տեղեկություններ է հայտնում

ԵՐԵՎԱՆ, 3 մայիսի./Նովոստի-Արմենիա/. ՀՀ ԱՆ-ն ներկայացրել է կորոնավիրուսային վիճակը Հայաստանում: Այս մասին նշվում է ԱՆ Facebook-յան էջում:

Մայիսի 3-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 2386 դեպք, որոնցից 1035-ն` առողջացած, 35-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 1312 պացիենտ: Ընդհանուր առմամբ, կատարվել է 24177 թեստավորում:

Այսպիսով` ունենք կորոնավիրուսային հիվանդությամբ հաստատված 113 նոր դեպք և 25 առողջացած։

«Մահվան դեպքերի վերաբերյալ հայտնում ենք, որ պացիենտները եղել են 79 (կին) և 58 (տղամարդ) տարեկան։ Վերջիններս ունեցել են ուղեկցող խրոնիկական հիվանդություններ»,- նշվում է հայտարարության մեջ:

ԱՆ-ից հիշեցնում են, որ նախորդ օրը արձանագրվել է մահվան ևս 1 դեպք, երբ պացիենտի մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով: Այդպիսի դեպքերի ընդհանուր թիվը 4 է։-0-