«Բիբարն է փչանում, փողը կտամ». Փաշինյանը խոստացել է փոխհատուցել ՌԴ-ի սահմանափակումներից տուժած արտահանողների վնասները

ԵՐԵՎԱՆ, 2 հունիսի․/Նովոստի–Արմենիա/․ ՀՀ վարչապետ Նիկոլ Փաշինյանը հայտարարել է, որ կառավարությունը պատրաստ է փոխհատուցել գործարարների վնասները ՌԴ արտահանման սահմանափակումների պատճառով փչացած գյուղմթերքի համար:

«Բիբարն է փչանում, այդ բիբարի փողը կտամ ես, կառավարությունը, վարդն է՝ կտամ։ Բայց այս ամենի արդյունքում Հայաստանի բիբարի արտադրությունն էլ է աճելու, արտահանումն էլ է աճելու», — ասաց Փաշինյանը Գեղարքունիքի մարզի Լճաշեն գյուղի բնակիչների հետ նախընտրական հանդիպման ժամանակ։

Նրա խոսքով՝ եթե Հայաստանում արտադրվում է 100 տոննա բիբար, երկիրը չպետք է 90 տոննան արտահանի մեկ ուղղությամբ, այլ պետք է 25-ական տոննա մատակարարի չորս տարբեր ուղղություններով, այնուհետև՝ հինգ, վեց, յոթ ուղղություններով։

«Սա է այն բանաձևը, որ ես ասում էի` անկախությունը քչերից կախվածությունը փոխարինելն է շատերից կախվածությամբ», — ասաց Փաշինյանը։

Հայաստանից ՌԴ արտադրանքի մատակարարումների սահմանափակումների մասին

Ռոսսելխոզնադզորը մայիսի 22-ից ժամանակավոր սահմանափակումներ է մտցրել Հայաստանից ծաղկային և պարենային արտադրանքի ներմուծման նկատմամբ՝ մինչև ՀՀ Սննդամթերքի անվտանգության տեսչական մարմնի հրավերով ռուս մասնագետների մասնակցությամբ տեսչական ստուգումների ավարտը։

Նաև Ռոսսելխոզնադզորը հայտարարել էր դժգոհությունների մասին՝ կապված Հայաստանից ՌԴ մատակարարվող մրգի և բանջարեղենի հետ։

Բացի այդ, Ռոսպոտրեբնադզորը կասեցրել է Հայաստանից «Ջերմուկ» հանքային ջրի բոլոր խմբաքանակների, ինչպես նաև հայկական երեք արտադրողների գինու և կոնյակի ներմուծումն ու շրջանառությունը Ռուսաստանում։

Ռոսսելխոզնադզորը 2026 թվականի մայիսի 30-ից ժամանակավոր սահմանափակումներ է մտցրել Հայաստանից ծագող և առաքվող թարմ լոլիկի, վարունգի, պղպեղի, կանաչեղենի և ելակի ներմուծման նկատմամբ՝ մինչև առաքվող արտադրանքի անվտանգության ապահովման համապատասխան ալգորիթմի մշակումը։