Աշխարհը գիտի Հայոց ցեղասպանության մասին, մնացածը քաղաքականություն է. հոլոքոստի փորձագետ

ԵՐԵՎԱՆ, 23 ապրիլի. /Նովոստի-Արմենիա/. Աշխարհը գիտի Հայոց ցեղասպանության մասին, մնացած ամեն ինչ բացատրվում է քաղաքական նկատառումներով, շաբաթ ասաց հոլոքոստի պատմության փորձագետ, պրոֆեսոր Փոլ Լևինը:

«Աշխարհը գիտի Հայոց ցեղասպանության մասին: Ուղղակի առանձին վերցրած ազգը փորձում է չխոսել այդ մասին: Բայց ես դասավանդում եմ այդ թեման, ինչպես իմ շատ գործընկերներ, դրան բազմաթիվ կազմակերպություններ են անդրադառնում»,- ասաց Լևինը Երևանում «Ընդդեմ ցեղասպանության հանցագործության» երկրորդ գլոբալ համաժողովի բացմանը:

Մեկնաբանելով այն փաստը, որ Հայոց ցեղասպանությունը չի ճանաչվել շատ երկրների կողմից պետական մակարդակով, Լևինն ասաց, որ քաղաքականությունն անհերքելի ճշմարտություն չէ:

«Շատ կարևոր է, երբ կառավարություններն օժանդակում են ցեղասպանության թեմայով բանավեճերին և չեն վախենում բախվել հակասությունների հետ: Ես սատարում եմ Հայաստանի` երկրորդ անգամ այսպիսի ֆորում կազմակերպելու գաղափարին»,- ասաց Լևինը:

Ըստ նրա, այսպիսի համաժողովները մեկ քայլ են դեպի ցեղասպանությունների ճանաչում, քանի որ մարդիկ, տուն վերադառնալով, պատմում են դրա մասին շրջապատի մարդկանց:

Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։

Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը։ -0-