Առաջարկվում է ֆիթնեսի ծախսերը ներառել առողջության ապահովագրության մեջ
ԵՐԵՎԱՆ, 5 հունիսի․/Նովոստի–Արմենիա/․ Կառավարության նիստի ժամանակ փոխվարչապետ Մհեր Գրիրգորյանն առաջարկել է ֆիթնեսի ծախսերը ներառել առողջության ապահովագրության մեջ։
Նրա խոսքով՝ եթե լուծվի ֆիթնես ծառայությունների որակի հարցը, լինի ստանդարտի նկատմամբ վստահություն և ներդրվեն քաղաքացու ֆիթնես պատմությունն արձանագրող թվային շտեմարաններ, կառավարությունը կմեկնարկի քեշբեքի ծրագիր:
«Եթե մարդ ծախս է անում իր ֆիթնեսի, սպորտի վրա, այդ ծախսը մենք կհամարենք առողջության ապահովագրության վճար, և ամբողջ ծախսը, որ կատարվում է այնտեղ, այստեղից կնվազեցվի», - ասաց Գրիգորյանը։
Փոխվարչապետը նշեց, որ կա քաղաքական պայմանավորվածություն, սակայն խնդիրը տեղեկատվական փոխանակման համակարգի մեջ է, որը պետք է լուծվի։
«Այսինքն՝ եթե մարդն այցելում է, օգտվում է այդ ծառայություններից, դա պետք է էլեկտրոնային արձանագրում ունենա, որպեսզի կարողանանք «Armed»-ում ներբեռնել և ավտոմատ քեշբեքի համակարգն աշխատի»,- ասաց Գրիգորյանը։
Նրա խոսքով` որքան շատ մարդը զբաղվի սպորտով, այդքան շատ հետվճար կստանա պարտադիր ապահովագրության ծախսից։
