ԵՐԵՎԱՆ, 23 մարտի․ /Նովոստի-Արմենիա/․ Երևանում արտակարգ դրություն հայտարարելուց հետո շտապօգնության կանչերի քանակը զգալիորեն նվազել է՝ 2020 թվականի հունվար-փետրվար ամսվա համեմատությամբ, երկուշաբթի Միասնական տեղեկատվական կենտրոնում կայացած մամուլի ասուլիսում ասաց «Երևան շտապ օգնություն» ՓԲԸ տնօրեն Թագուի Ստեփանյանը:
Մարտի 16-ից ապրիլի 14-ը Հայաստանում գործում է արտակարգ դրություն՝ կորոնավիրուսի տարածումը կանխելու նպատակով:
«Եթե հունվարին և փետրվարին շտապ օգնության ծառայությունը սպասարկում էր 900-950 կանչ, ապա այժմ միայն 700-750-ը», - ասաց Ստեփանյանը:
Ըստ նրա, կանչերի շարքում, ինչպես նախկինում, առաջատարը սիրտ-անոթային համակարգի հիվանդությունների հետ կապված բողոքներն ու սուր շնչառական հիվանդություններն են, վնասվածքները երրորդ տեղում են:
«Եթե համեմատենք հունվար-փետրվար ամսվա և արտակարգ դրության առաջին շաբաթվա տվյալները, ապա կարող ենք նկատել սուր շնչառական հիվանդությունների պատճառով զանգերի կրճատում: Եթե նախկինում օրական150-200 նման կանչեր էինք սպասարկում, ապա մարտ ամսին այդ թիվը նվազել է մինչև 100-140 դեպք, ինչը կազմում է բոլոր կանչերի միայն 10-15% -ը: Կանչերի 20% -ը, ինչպես նախկինում, կապված է սրտանոթային համակարգի հիվանդությունների հետ», - ասաց ծառայության ղեկավարը:
Ինչպես նշեց Ստեփանյանը, կան նաև կորոնավիրուսային վարակի տարածման հետ կապված խուճապից առաջացած զանգեր:
«Օգտվելով հնարավորությունից՝ ես ցանկանում եմ հորդորել մեր քաղաքացիներին զանգահարել միայն անհրաժեշտության դեպքում, քանի որ մեր բրիգադները այս օրերին ծանրաբեռնված են աշխատանքով: Եվ պետք չէ զանգահարել «Շտապ օգնության» թոքերը լսելու համար: Սխալ է նաև այն կարծիքը, թե կորոնավիրուսի կասկածի դեպքում, մեր անձնակազմն անմիջապես կտեղափոխի ինֆեկցիոն հիվանդանոց կամ թեստավորման», - ասաց նա:
Բժշկական ծառայության տնօրենը շեշտեց, որ մեկուսացման և թեստավորման հիմք է հանդիսանում առանձնահատուկ ախտանիշների ողջ սպեկտրը, վարակի աղբյուրի հետ հնարավոր կապը, անմիջական շփման շրջանակում գտնվող մարդկանց վարակի դեպքերը, ինչպես նաև ընտանեկան բժշկի խորհուրդը:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
