ԵՐԵՎԱՆ, 19 մարտի./Նովոստի–Արմենիա/. Հայաստանում ամեն օր կատարվում է կորոնավիրուսի ախտորոշման ավելի քան 100 թեստ, ասել է ՀՀ առողջապահության նախարար Արսեն Թորոսյանը չորեքշաբթի Հանրային հեռուստաընկերության եթերում։
«Թեստերի մեծ մասը բացասական է», – ասել է նա։
Նախարարը նաև նշել է, որ այս պահին թեստավորում հնարավոր է իրականացնել միայն Առողջապահության նախարարության լաբորատորիայում։
Загружается новость ... "Лево"
«Դա միակ վայրն է, որտեղ կա համաճարակաբանական անվտանգության բարձր մակարդակ։ Մնացած բոլոր տեղերում պարզապես անհնար է իրականացնել (թեստավորում, խմբգր.)», – ասել է Թորոսյանը։
Նրա խոսքով, կա կորոնավիրուսի թեստի անցկացման մի քանի նախադրյալ։ Մասնավորապես, եթե մարդն այցելել է այն երկրներ, որտեղ հիվանդությունն արդեն տարածվել է, և արդեն վարակակիր անձի հետ կոնտակտի առկայություն։
Անդրադառնալով ռապիդ–թեստերի ձեռքբերման հարցին` Թորոսյանը տեղեկացրել է, որ այդ ուղղությամբ աշխատանքներն ընթանում են, սակայն նշեց, որ Առողջապահության համաշխարհային կազմակերպությունը դեռևս չի հաստատել, թե որքանով են նման թեստերը ճշգրիտ։
Առողջապահության նախարարը նաև տեղեկացրել է, որ «Գոլդեն Փելես» հյուրանոցը հիմա արդեն ամբողջովին զբաղված է, մեկուսացված է մոտ 600 մարդ։
ՀՀ կառավարությունը մարտի 16–ից ապրիլի 14–ը հայտարարել է արտակարգ դրություն երկրում կորոնավիրուսի տարածումը կանխելու նպատակով։
Մարտի 18–ի դրությամբ Հայաստանում գրանցվել է կորոնավիրուսով վարակման 110 դեպք։ Առաջին դեպքը հաստատվել է մարտի 1–ին, պացիենտն արդեն առողջացել է և դուրս է գրվել հիվանդանոցից։ Վարակակիրների շրջանում են Իրանից և Իտալիայից ժամանած ՀՀ քաղաքացիներ` Երևանի, Էջմիածնի, Մեղրիի և Չարենցավանի բնակիչներ, նրանց հետ շփված անձինք, ինչպես նաև Իտալիայի մեկ քաղաքացի և Ֆրանսիայից ժամանած անձ։ Վարակակիրների մեծ մասը, այդ թվում` դպրոցահասակ երեխան, Էջմիածնի բնակիչներ են, ինչպես նաև Երևանի արտադրամասում վարակակիրների հետ շփված անձինք։–0–