ԵՐԵՎԱՆ, 27 ապրիլի./Նովոստի–Արմենիա/. ՀՀ առողջապահության նախարար Արսեն Թորոսյանը խոսել է սխալի մասին, որը բաց է թողել Հայաստանը կորոնավիրուսի դեմ պայքարում։
«Մեր սխալն այն էր, որ մենք թույլ տվեցինք մեկուսացված քաղաքացիներից մեկին դուրս գալ և մասնակցել սգո արարողությանը, տեղի ունեցավ պարզ կանոնների խախտում, ինչից հետո մենք ընդհանրապես դադարեցրեցինք նման պրակտիկան, քանի որ այն իր մեջ պարունակում է նման ռիսկ», – ասել է նա «Ազատություն» ռ/կ–ին տված հարցազրույցում։
«Մնացած բոլոր դեպքերում մեր քաղաքացիները մնում են հյուրանոցներում, նրանց նկատմամբ սահմանվել է ինչպես բժշկական, այնպես էլ այլ հսկողություն, որպեսզի տեղի չունենան ռեժիմի խախտումներ», – ասել է Թորոսյանը։
Загружается новость ... "Лево"
Խոսելով արտերկրից Հայաստան ժամանող քաղաքացիների մասին` նախարարը նշել է, որ եղել են դեպքեր, երբ նրանցից 10-15% –ի դեպքում կարանտինի 14–օրյա ժամկետից հետո թեստը եղել է դրական։
«Դա վկայում է այն մասին, որ այս մեթոդն իրեն արդարացնում է, և մենք փորձում ենք այնպես անել, որպեսզի մեր ռեսուրսները բավարարեն», – պարզաբանել է նա։
Նախարարի խոսքով, այս փորձը ամենահաջողներից մեկն է Հայաստանում կորոնավիրուսի դեմ պայքարի միջոցների թվում։
«Նորաշենի դեպքը բացառություն էր, այն մի փոքր սթափեցրեց մեզ, սակայն կարող եմ ասել, որ, այդուհանդերձ, այն չունեցավ ողբերգական ելք», – ասել է Թորոսյանը` հավելելով, որ վարակված քաղաքացու հետ կոնտակտի մեջ եղած բոլոր քաղաքացիները մեկուսացվել են։
Հայաստանում ապրիլի 26–ի դրությամբ գրանցվել է կորոնավիրուսով վարակման 1746 դեպք, առողջացել է 833 մարդ, փաստացի բուժվում է 885 մարդ, 28 մարդ, ցավոք, մահացել է։–0–