«Սիրելի պարետ Ավինյան, Երևանում այլևս չեմ դիմանում». Տիգրան Ավինյանը պատասխանել է փոքրիկ Սոնայի նամակին (ՖՈՏՈ)

ԵՐԵՎԱՆ, 4 ապրիլի./Նովոստի–Արմենիա/. ՀՀ փոխվարչապետ, արտակարգ դրության ժամանակ պարետատան պարետ Տիգրան Ավինյանը պատասխանել է Սոնա անունով աղջնակի նամակին, ով խնդրել է իրեն ու հայրիկին թույլ տալ Երևանից գնալ գյուղ։

Տիգրան Ավինյանը Facebook–յան իր էջում պատասխանել է աղջնակի նամակին`նշելով, որ ցավում է, որ աղջիկը հայրիկի հետ չի կարող գյուղ գնալ։

«Հավատա` բոլոր սահմանափակումները միայն քո, ընտանիքիդ, ընկերներիդ, մեր բոլորի առողջության համար են։ Այս ամենը ժամանակավոր է, և շատ շուտով դու և մյուս փոքրիկները դարձյալ դպրոց եք հաճախելու և խաղալու եք բակում», – գրել է Ավինյանը նամակում։

Նշենք, որ կորոնավիրուսի տարածումը կանխարգելելու նպատակով Հայաստանում գործում են խիստ սահմանափակումներ, մասնավորապես, դադարեցվել է հանրային տրանսպորտի գործունեությունը, սահմանափակվել է մարդկանց տեղաշարժը Երևանի և մարզերի միջև։–0–