Կա մի վտանգավոր տենդենց. Թորոսյանը կորոնավիրուսի հետ կապված նոր տվյալներ ներկայացրեց
ԵՐԵՎԱՆ, 4 հունիսի./Նովոստի–Արմենիա/. ՀՀ առողջապահության նախարար Արսեն Թորոսյանն այսօր կառավարության նիստի ժամանակ նշեց, որ մինչ օրս արձանագրված ամենամեծ թիվն ենք ունեցել կորոնավիրուսով դեպքերի՝ 697 նոր դեպք։
«Հետևաբար, ընդահանուր դեպքերի թիվը հատել է 11 հազարի շեմը՝ հասնելով 11 221-ի: Ծանր և ծայրահեղ ծանր քաղաքացիների թիվը մոտավորապես նույնն է մնում: Ծանր վիճակում է 391 մարդ, իսկ ծայրահեղ ծանր՝ 59 հոգի, թոքերի օդափոխության սարքերին միացված 15 հոգի: Նաև կա մի վտանգավոր տենդենց, որ նորից ունենում ենք դեպքեր տարբեր արտադրական կոլեկտիվներում», – նշեց նախարարն` ավելացնելով, որ փորձը ցույց է տալիս, որ դրանից հետո հնարավոր է մեծ բռնկում:
«Փաստացի հիմա հնարավոր է նմանատիպ սցենար ունենանք, դրա համար շատ կարևոր է հենց արտադրական ձեռնարկություններում կանոնների խիստ պահպանումը»,-ասաց Թորոսյանը:
Նրա խոսքով, լարված է մնում ամենօրյա հոսպիտալիզացիաների իրավիճակը։
«Որպես օրինակ բերեմ, որ այս արձանագրված դեպքերի մոտավորապես 15-20 տոկոսը կարիք ունի հոսպիտալիզացիա: Մենք ամենօրյա ռեժիմով գրեթե ձեռքով տեղավորում ենք պացիենտներին եղած մահճակալային ֆոնդի վրա: Եվ շատ կարևոր է, որ թվերի էական անկում արձանագրենք, որպեսզի կարողանանք այդ գործընթացը շարունակել այնպես, ինչպես միշտ արել ենք, այսինքն որ մեկին չթողնենք առանց բուժօգնության: Հակառակ պարագայում շատ դժվար է լինելու այդ ամենն ապահովել: Մեր գործողությունները պետք է հենց սրանից բխեն»,-ասաց նա:
Հայաստանում հունիսի 4-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 11221 դեպք, որոնցից 3468-ն` առողջացած, 176-ը` մահվան ելքով։–0–
