ԵՐԵՎԱՆ, 2 հուլիսի./Նովոստի–Արմենիա/. Հայաստանը բանակցություններ է վարում COVID-19–ի պատվաստանյութերը գնելու շուրջ, որոնք, սակայն, դեռ մշակման փուլում են, ասաց առողջապահության նախարար Արսեն Թորոսյանն այսօր կառավարության նիստի ժամանակ։
Загружается новость ... "Лево"
Նախարարն ընդգծեց, որ աշխարհում արդեն մշակվում է ավելի քան 100 պատվաստանյութ, որոնցից 20–ը կարող են արդյունավետ լինել։
Նա նշեց, որ փորձարկումներն անցկացվում են երեք փուլով։ Առաջին երկու փուլերը ցույց են տվել, որ ամենայն հավանականությամբ կլինեն պատվաստանյութեր և միանգամից մի քանիսը, ինչը շատ կարևոր է աշխարհի բնակչության համար։
«Մենք հիմա բանակցություններ ենք վարում մի քանի ուղղություններով: Առաջինը ուղիղ արտադրողներն են, ես անձամբ եմ այդ բանակցությունները վարում: Երեկ խոսել եմ «Մոդեռնա» ընկերության կոմերցիոն տնօրենի հետ, որը մեր հայրենակից Նուբար Աֆեյանի հետ փոխկապակցված ընկերություն է: Այդ պատվաստանյութը ամենահավանական թեկնածուներից մեկն է: Նաև բանակցում ենք ԱՀԿ-ի, ՅՈՒՆԻՍԵՖ-ի պլատֆորմների հետ, որ փորձելու են հավաքական գնումներ իրականացնել։ Այստեղ ամենամեծ վտանգն այն է, որ կարող են լինել երկրներ, որոնք միանգամից մեծ քանակի պատվաստանյութ կգնեն և մյուս երկրներին դա հասնի շատ ուշ: Ասենք, որոշ երկրների պատվաստանյութը հասնի 2021-ի սկզբին, իսկ մյուս երկրներին հասնի դրանից մեկ տարի հետո: Դրա համար շատ կարևոր է բանակցությունները վարել հենց այսօրվանից, նույնիսկ դեռ չունենալով վերջնական արտադրանքը», – ընդգծեց նախարարը։
Նա ասաց, որ տարբեր գնահատականներով պատվաստանյութը երկրների համար հասանելի կլինի կամ այս տարվա վերջին կամ հաջորդ տարվա սկզբին: Դա վերջնական պարզ կլինի աշնան սկզբին, որովհետև երրորդ փուլի հետազոտությունների ամփոփումը սպասվում է այդ ժամանակ:
«Փաստը, որ դա լինելու է և մենք վերադառնալու ենք մեր սովորական կյանքին, արդեն ուրախալի է: Պետք է հետ չմնանք զարգացումներից», – ընդգծեց Թորոսյանը։-0-