Հայաստանում, հնարավոր է, կորոնավիրուսի թեստեր արտադրվեն. փոխվարչապետ (ՎԻԴԵՈ)

ԵՐԵՎԱՆ, 31 մարտի./Նովոստի–Արմենիա/. Հայաստանում, հնարավոր է, սկսվի կորոնավիրուսի թեստերի արտադրություն, հայտարարեց ՀՀ փոխվարչպետ, արտակարգ դրության ժամանակ պարետատան պարետ Տիգրան Ավինյանը։


«Ուզում եմ տեղեկացնել, որ այս պահին մենք մեր գիտական ինստիտուտներից մեկի հետ քննարկում ենք թեստերի տեղական արտադրության հարցը։ Մենք նաև կաջակցենք նրանց հումքի ապահովման հարցում», – տեղեկացրեց Ավինյանը։

Նա ընդգծեց, որ նախնական քննարկման համաձայն` նախատեսվում է արտադրել մոտ 100 հազար թեստ, եթե հնարավոր լինի ապահովել անհրաժեշտ բոլոր պայմանները։

«Այս պահին մենք փորձում ենք հասկանալ` արդյոք կկարողանանք ներկրել հատուկ սարքավորումներ, որոնք կարտադրեն թեստեր ավտոմատացված ռեժիմում», – ավելացրեց պարետը։

Նշենք, որ մարտի 31–ի դրությամբ, Հայաստանում հաստատվել է կորոնավիրուսով վարակման 532 դեպք, 31 մարդ բուժվել է, 3 մարդ, ցավոք, մահացել է։–0–