ՀՀ վարչապետը ներկայացրել է կորոնավիրուսի պայմաններում սոցիալական աջակցության բաշխման տրամաբանությունը (ՎԻԴԵՈ)

ԵՐԵՎԱՆ, 6 ապրիլի./Նովոստի–Արմենիա/. ՀՀ վարչապետ Նիկոլ Փաշինյանը, պատասխանելով կառավարության կողմից քաղաքացիներին սոցիալական աջակցության տրամադրման հարցին, ներկայացրել է այդ օգնությունը տրամադրելու տրամաբանությունը։

Այս մասին նա խոսել է` պատասխանելով քաղաքացիների հարցերին Facebook-յան իր էջում ուղիղ եթերի ժամանակ։

ՀՀ կառավարությունն ընդհանուր առմամբ հաստատել է կորոնավիրուսի տնտեսական հետևանքները չեզոքացնելու ինը ծրագիր։ Մարտի 26–ին հաստատվել է տարբեր ուղղությունների հինգ փաթեթ, մարտի 30–ին` աջակցության ևս երեք ծրագիր, ինչպես նաև մեկ ծրագիր` ապրիլի 2–ին։ Ինը ծրագրերից 5–ը վերաբերում է բիզնեսին և գյուղատնտեսության ոլորտին տրամադրվող տնտեսական աջակցությանը, իսկ 4–ը` բնակչության տարբեր խմբերին տրամադրվող սոցիալական աջակցությանը։

«Աջակցության ծրագրերում մեզ համար ամենակարևորն է ապահովել հասցեականությունը։ Կան երեխաներ, որոնք կարիք չունեն այնպիսի աջակցության, ինչպես մյուսները։ Եթե մենք բոլորին աջակցենք, դա նշանակում է, որ մենք ռեսուրսները տրամադրում ենք նաև նրանց, ովքեր դրա կարիքը չունի», – ասաց Փաշինյանը։

Նա նշեց, որ կան երեխաներ, որոնց ծնողների եկամուտն այս ընթացքում չի կրճատվել, այլ ավելացել է, և նրանք նպաստի կարիք չունեն։


«Եթե մենք օգնենք բոլորին, ապա դա կնշանակի, որ ավելի քիչ կօգնենք այն մարդկանց, ովքեր իսկապես օգնության կարիք ունեն», – ասաց վարչապետը։

Նա նշեց, որ ծրագրերը ստեղծելիս փոձ է արվել ձևակերպել դրանք այնպես, որպեսզի եթե ընտանիքը չի հայտնվում մի ծրագրի գործողության տակ, ապա օգնություն ստանա մյուս ծրագրի շրջանակում։
Նրա խոսքով, կառավարությունը, գոյություն ունեցող ծրագրերը համալրելու նպատակով, իրականացնում է մշտական մոնիտորինգ` բացահայտելու համար այն քաղաքացիներին, ովքեր օգնության կարիք ունեն, բայց չեն ստանում։

Մարտի 16-ից ապրիլի 14-ը Հայաստանում, կորոնավիրուսի տարածումը կանխելու նպատակով, գործում է արտակարգ դրություն: Արտակարգ դրության պայմաններում Հայաստանում ազատ տեղաշարժի և տնտեսական գործունեության որոշ տեսակների սահմանափակումները (նախկինում գործում էր մարտի 24-ից մարտի 31-ը) երկարաձգվել են մինչև ապրիլի 12-ը ներառյալ:

Ապրիլի 6–ի դրությամբ Հայաստանում կորոնավիրուսով վարակվել է 833 մարդ, բուժվել է 62 մարդ, փաստացի բուժում է ստանում 763 պացիենտ, բացասական թեստերի թիվը 4096 է, 8 մարդ, ցավոք, մահացել է։-0-